Ua taunuu manaoga o le toatele ina ua matagā le taunuuga o taaloga a le aulakapi taitoafitu a le Manu Samoa o lenei tausaga, ia faia se suiga pe a foi i fanua le ‘au, ina ua mae‘a vae e lua o le taamilosaga a le IRB i nai vaiaso e lei mamao tele atu. O le suiga ua iai nei ua toe aami ai e le Iuni le faiaoga o le tatou aulakapi a le Manu Samoa sefululima, le susuga Stephen Betham na te faia se tapenaga mo le au taitoafitu a le atunuu mo le Ipu o le lalolagi i le lakapi fitu e faia i Rusia i le faaiuga o le masina fou o Iuni.
O le taunuuga lea o le fonotaga a le Iuni i le Aso Tofi ua mavae ma le pulega o le aulakapi fitu a le atunuu ina ua toe faaolatia i fanua. O Stephen sa avea muamua ma faiaoga o le aulakapi fitu a le atunuu ae na tofia e avea ma faiaoga o le tatou Manu Samoa sefululima ina ua mae‘a ona saili se faiaoga i le tuanai o le Ipu o le lalolagi talu ai.
Faaalia e le taitaifono o le iuni lakapi aoao a Samoa le afioga i le Palemia, Susuga Tuilaepa Lupesoliai Sailele Malielegaoi, o Stephen e maoae tele le tulaga na ia faatautaia ai le aulakapi fitu a Samoa e pei ona sa siamupini aoao ai i le taamilosaga fitu faavaomalo a le IRB i le tausaga e 2010, faapea foi ona maualuga ai le tulaga o le ‘au a le atunuu a o ia taitaia.
I se finagalo o le taitaifono o le iuni i feiloaiga ma ia i le vaiaso ua mavae sa ia faaalia ai, e lē o mafai e le faiaoga le susuga Faamaoni Lalomilo ona faaosofia lagona o tama o le ‘au i le tulaga e tatau ona maua ai se manumalo, e lē pei o Stephen. O lona finagalo lea i se talanoaga ma le faletelevise ma le leitio o le EFKS TV.
Ua ia faaalia ai foi, o le a iai se isi tagata e filifilia e lagolago i le susuga Stephen ae lē o le susuga Faamaoni.
O lona finagalo na faaalia i lea fale faasalalau, o se tasi sa avea ma faiaoga o le SCOPA o le a fesoasoani ia Stephen Betham. Ua mae‘a ona fili le ‘au mo Rusia e pei ona saunoa le taitaifono ma ua amata ona toe tapenapena mo le Ipu o le lalolagi i le masina fou, ma o se taamilosaga tāua tele lea mo Samoa ma isi atunuu o le a tausinio ai.
E ui ina lē ausia e le ‘au lakapi fitu a le atunuu se manumalo i le vae mulimuli o le taamilosaga o lenei tausaga i Egelani, ae o loo tumau pea i le tulaga fa i le faasologa o ‘au pito i luga.
Tumau pea Samoa i le tulaga 4 lakapi fitu a le lalolagi
E ui ina faaletonu le faaiuga o taumafaiga a le au lakapi taitoafitu a le atunuu i vae e lua mulimuli o le taamilosaga o lenei tausaga, ae o lea ua tumau pea le tulaga o le au taitoafitu a le Manu Samoa i le tulaga 4, i le faasologa o au lakapi taitoafitu a le lalolagi.
O Niu Sila o loo tulaga muamua, pito i ai Aferika i Saute i le tulaga lua, o Fiti i le tulaga 3, ae tulaga fā ai Samoa.
O le au a Kenya lea ua see ane i le tulaga lima, Egelani i le tulaga ono, Uelese i le tulaga fitu ma Ausetalia lea na faiaina ia Niu Sila i le suega siamupini o le ipu autū o le taitoafitu i Lonetona ua tietie i le tulaga valu. O Farani o loo i le tulaga iva ma Argentina lea na faiaina ai le au taitoafitu a le Manu Samoa i taaloga o pulu i le taamilosaga i le faaiuga o le vaiaso ua saofai i le tulaga sefulu.
O lea ua la ua fai nei le faaiuga a le Iuni lakapi, e pei ona taunuu i ai le faaiuga o taaloga a le aulakapi taitoafitu a Samoa i le taamilosaga i Sikotilani ma Egelani e pei ona molimauina le maualalo tele o le tulaga sa iai le taaalo a le ‘au.
