O se Aso Faapitoa i le soifuaga o le fanau a Ekalesia eseese i atunuu mamao e aofia ai Ausetalia le faamanatuina o le Lotu Tamaiti poo le Aso Sa Paepae e pei ona soifua mai ai o latou mātua mai Samoa ae lei siitia mai i fafo. O le aso e lē gata o le moe miti i ai o le fanau i le fou o seevae ma totigi papae, ofuvae ma iefaitaga, fusiua ma ofutino aemaise teineiti i o latou ofu, ripine pale ma teuga.
O le aso foi lenei aemaise lava i Samoa mai aso ua tuanai e faatoa tausami ai nai fanau i taumafa e lē maua i aso uma e pei o le Weetbix, peanut butter, supoketi, fuamoa ma le bacon poo le ham i le taumafataga o le taeao (breakfast) aemaise le toonai mamafa ma le afiafi i le tuua o sauniga.
I nei vaitau i atunuu e pei o Ausetalia nei ma Niu Sila ua maua uma nei taumafataga ma nisi ae o tala faamatala a mātua i fanau i le soifua mai Samoa o se aso faapitoa.
O le pau foi lea o le aso e tapena ai e mātua taumafataga mo le fanau ma kuka toonai tetele a o alo atu le fanau e laugaina le Tusi Paia ma fai a latou tauloto e fai ma taiala i o latou olaga. I Sini nei e leai ma se suiga tele o lenei Aso faapitoa sa vaaia e amata lava i vaiaso o aoga mea i le falesa ma maota o galuega. E fetaui lelei foi ma le lua vaiaso o malologa a aoga lea e maua uma ai tauloto, pese ma tala a le fanau. I malumalu eseese na feilafi ofu ma teuga papae a le fanau na logo mālie ma pesepesega ma viiga o le Atua.
O tauloto taitasi o nisi nei o taiala mo soifua atiae o le tupulaga a Ekalesia ma o nisi fanau e lē malamalama lelei ai i le taimi nei ae a toe faitau ma faalogo ai i le lumanai e faapupulaina lona uiga ma le aogā. O le sauniga atoa e pei o le tatalo amata, faitauina o le Tusi Paia, Tatalo ma le Lauga, seia oo lava i le aoina o le sene o auala nei e faataitai ai fanau i faavae ma aoaoaga o le lotu.
I mātua o se taimi e maligi ai foi loimata i le faafofoga atu i le laugaina e le fanau o afioga Paia a le Alii. O nisi foi o fanau na vaaia le loto vaivai ae o nisi sa iloga ai o latou uiga mālie ma le faaluma i taimi o tauloto. O nisi o fanau o le a avea le faamanatuina i tausaga taitasi o le Lotu Tamaiti ma avanoa e lagona ai foi le naunau e fia avea ma ‘auauna a le Atua i le lumanai.’ E moni ai le upu a le Tusi, ‘Aoao le tama i ona Ala a matua ane e lē tea ese Ai.’
