O loo molimauina pea le soifua sailimalo o nai o tatou tagata i totonu o Perisipeni e ala i aoaoga, o taaloga, o le tautua i le Atua ma lona finagalo ae faapea foi pisinisi.
O le po o le Aso Faraile na tea nei aso 14 o Novema 2014, na tatalaina ai le tautua a le Malala Ola Catering.
O le faamoemoe ma le anavatau a lea foi auaunaga, e faapitoaugafa lava i le tautuaina o le atunuu aemaise o le fia soosoo tau‘au lea i nisi o foi o tamalii o Samoa i Perisipeni, e ala i le tapenaga lea o le fofoga taumafa, auā foi faalavelave ma meafai a le atunuu, e pei ona masani ai.
O le Malala Ola Catering o loo pulea e nisi foi o alo ma tamafanau a Samoa, le susuga ia Paul Duffy ma le faletua, faapea foi le afioga ia Toleafoa Sefo Tenesio ma le faletua ia Vanesa, ma nisi o le auaiga o loo lagolagosua i lenei foi tautua.
Ua ofo mai foi le tautua a le alii o Anthony Milford, e pei ona filifilia nei e le kalapu lakapi liki a le Brisbane Broncos, e lagolago malosi ma fesoasoani i le Malala Ola Catering.
Ua tatala foi lana tautua ia Samoa, i totonu o Perisipeni nei, faapea foi le setete o Kuiniselani.
