“$62,000 le siakitupe a le kamupani mai Saina o loo tuua‘ia ai le Minisita lagolago”
Ua molimau le afioga Muagututagata Peter Ah Him, e leai ma sona aafiaga i tuua‘iga ua faaalia i moliaga a leoleo e faapea sa iai lona faamoemoe e faatino se solitulafono, i lona faia o ni suiga i faamaumauga o le invoice a lana kamupani o le ABM (Apia Business Machine).
O le invoice lea na ave i le kamupani o le Grand Ocean Industries i Saina mo le totogi mai o lana $32 afe na ave ai i tua pusaoloa e lua poo containers a le kamupani mai Saina, lea na tuu faatasi i ai ma le $30 afe o le totogi lea o le auaunaga a lana pisinisi o le ABM i le faiga o galuega mo le teuina o pusaoloa.
O le aofaiga atoa o le siaki tupe na aumai e le Grand Ocean e $62,000 ma ona tupu. Peitai na silasila lea kamupani e iai nisi uiga solitulafono na faia i le tapenaina o lea pili, o le mafuaaga lena na fesiligia ai le alii Minisita lagolago, o se tasi o faatonu poo se director o le Grand Ocean lea e sefulu pasene ona sea i totonu o le kamupani.
O loo faatalia nei se faaiuga a le faamasinoga maualuga i molimau sa suesueina o lenei mataupu lea sa faagasolo i le vaiaso ua mavae. O loo teena e Muagututagata moliaga e fā a leoleo e aofia ai le moliaga o le gaoi, taufaasese, ma le faasese o faamaumauga.
O le kamupani e faia pepa e tiute ai oloa e aumai mai fafo o le Savea Savelio Customs Agent na faia pepa. Sa molimau le alii pule o le Customs Agent lea e faapea sa faatonuina o ia e le minisita lagolago e faia nisi suiga i luga o pepa ina ia tuu i ai ma le totogi faapitoa poo le special cost e $30 afe. Peitai na molimau le alii minisita lagolago e leai sana faatonuga na faia faapea, ae o lona faletua na faia tapenaga uma o le invoice.
Na tu‘ifesili pea e le tamaitai loia mo le itu a leoleo le minisita lagolago pe moni pe a faapea atu, o lana taumafaiga na faatino sa ia faamoemoe ai e faatino se gaioiga taufaasese ina ia maua ai le tolu sefulu afe o le totogi faapitoa poo le special cost, ae na tali Muagututagata e lē sa‘o.
O tolaulauga o mau o lenei mataupu na faailoa ai ua toe totogi e Muagututagata le tupe e tolusefulu afe i le kamupani o le Grand Ocean. Na faailoa foi e lē ua molia ina ua fesiligia e loia a leoleo ua mae‘a ona totogi uma lea seleni.
Na faailoa e le minisita lagolago i lana molimau, sa amata ona aafia i le pisinisi o le Grand Ocean ina ua latou feiloai ma nisi alii faipisinisi mai Saina sa mananao e fai se faletalimalo, se kamupani telefoni feaveai, ma se kamupani e gaosia le eletise e maua mai i le malosi o le la poo le solar power.
O se tamaitai Saina ma lona toalua o se tagatānuu foi mai Saina o sui ia o le Grand Ocean i Samoa o loo iai lona lala.
