A mae‘a ona tatou faia o se galuega ona tatou faapea ifo lea, “O i tatou o auauna lē aogā lava i tatou”.
Faafetai le agalelei o le Atua, ona ua mafai ona faaiuina ma le manuia le tatalaina o la‘u CD Vol-5 ua faaigoaina, “Aisea ea lo‘u au ua e tagi ai?”. E 13 pese o loo iai i totonu.
Sa matuā faatumulia le Apiaway Nite Club i Magele, ia i latou uma na auai atu e lagolagoina le faamoemoe o le susuga Eterona.
Sa momoli le faafetai a le alii pese i ana sponsors na agalelei mai i lenei faamoemoe e pei o le susuga ia Fialii Mariner, Kingston Latras Amos, Tarnica Cars, Pinati’s Keke Puaa, ma Le La o Samoa Sewing Shop. Na pepese ai foi i lea po, le tofa ia Tolumaanave Misiluki Su‘a, Mautoatasi Asuao, Matafua F. Purcell ma le Toafā Faiumu, aemaise i latou uma sa fai o latou sao eseese i le faamatagofieina o lea po.
O le faletua ia Sia Su‘a sa avea ma Fofoga o le po, ua matagofie ai le polokalame i lea po. E lē gata i lea sa faafiafia foi Le La o Samoa Dance Group ia latou faafiafiaga matagofie, aemaise le ailao naifo a le susuga ia Lenni Ropati Mamea.
O le susuga Eterona Ioasa e mai afioaga i Samoa, o Salelologa, Nofoalii, Afega ma Falelatai. E toe faaleo foi le faafetai a Eterona mo nai ona aiga uma sa faamaopoopoina le faamoemoe, aemaise i latou mai ona afioaga sa auai atu i lea po.
O le a silafia lava i luga o le tatou leitio faleoloa o le a faatauina ai le CD Vol-5 a Eterona, “Aisea ea lo‘u au ua e tagi ai?”
