“Ia oo le tautua i tagata Samoa uma”
…Rev Elder Peleti Toese Toailoa
I le tele o tausaga o aumau o tatou tagata i setete eseese o le atunuu tele o Ausetalia, sa lē mafai ona tuua lo latou naunau e maua fesootaiga i auala o faasalalauga i luga o leitio ma nusipepa faapea ma televise.
O le faasologa mai o tausaga ua alu e oo mai i le taimi nei, ua faalogoina i Ausetalia siufofoga o o tatou tagata ona o a latou auaunaga i luga o leitio o loo totogi ai itula mo le faia ai o polokalame i le gagana Samoa. O ia fesootaiga uma e na o le tailua pe tolu aso o nisi polokalame, a o nisi foi e na o le taitasi aso ae lē tele ni itula e faasalalau ai auā e fuafua i le seleni maua e totogi ai itula o faasalalauga.
O le taimi nei ua amata faasalalauga a se leitio ua galulue ai nisi o tamalii ma failauga o le tatou atunuu o loo alala ma papaaao i Sini Ausetalia. O le Aso Toonai na tea nei na tatala aloaia ai le leitio o le siufofoga o le Le Manamea Samoa, mo le 24 itula o ana faasalalauga e faia i totonu o le fitu aso o le vaiaso.
O se auaunaga muamua lea tau leitio i Ausetalia ua ausia lea tulaga maualuga, e pei ona faaalia e le pulega i le afioga Sulusulumaivasa Aiva Alofa ma le faletua o Katie, lea ua la pulea ma faagaioi lea auaunaga. O le afioga Sulusulumaivasa e iai foi le isi ana auaunaga tau faasalalauga o se nusipepa ua faaigoaina o Le Manamea Samoa, lea foi ua faaigoa ai le leitio faasalalau o le Siufofoga o le Manamea Samoa, ua faasalalau i le alaleo o le short wave (SW1).
O le tausaga na tea nei na amata silasila ai le afioga i le alii Pule faatonu le afioga Sulusulumaivasa Aiva II ma lona faletua o Katie i le faatuina o se leitio e mafai ona faasalalau i le fitu aso o le vaiaso i le 24 itula o aso taitasi. O ia tapenaga na mafai ai loa ona faia feuiuiaiga uma ma maua ai le laisene e faaagioi ai le leitio i se tulaga faapisinisi poo se commercial radio station.
O le luitau o le auaunaga amata a le siufofoga o Le Manamea Samoa i Sini Ausetalia na saunoa i ai le susuga i le Toeaina Faatonu na taitaia le sauniga lotu. “O le mau tauave a Le Manamea Samoa, Reach out to the people of Samoa, lona uiga ia oo le galuega a Le Manamea Samoa i tagata Samoa”.
O le faamatalaina o le mau a le toeaina faatonu, ia mafai e le tautua a le leitio ona momoli i tagata Samoa faasalalauga eseese mo lo latou silafia o faamatalaga uma aemaise o faafiafiaga ma musika.
O le toatele na auai i le tatalaina o le leitio o paaga a le Siufofoga o le Manamea Samoa faapea aiga ma uo.
