Talu ona faavae mai i le lua tausaga talu ai, ma amata faatino ana fesoasoani i le tausaga na tea nei, ua sili atu i le $7 miliona tala ua faamatuu atu i faalapotopotoga tumaoti ma faalapotopotoga i totonu o afioaga o Samoa auā le faatuina ma le faalautele ai o a latou atinae eseese.
O atinae e pei o togalaau ‘aina, o faasao o le i‘a o le tilapia, o faasao o isi figota o le gataifale ma isi faatoaga ua aofia uma lava i lalo o lenei polokalame fesoasoani. O le tausaga lenei ua mae‘a ona faamaonia talosaga e 35 ma e alu ai le tinoitupe e $700,000 ma o le vaega muamua lenei o lea fesoasoani lea e amata mai i le $5,000 i le $30,000 tupe e faatino ai.
O le vaega lona lua e amata le fesoasoani i le $30,000 e oo atu i le $150,000 ua faapea ona tuu atu le Aso Tofi o le vaiaso fou e faagata ai talosaga mo ia atinae. O le CSSP ua faapuupuu ai le igoa o le faalapotopotoga lenei e ta‘ua o le Civil Society Support Programme. O se lagolago ua ave i faalapotopotoga tumaoti ma faalapotopotoga a nuu, ekalesia ma itumalo.
“E tolu lava auga o le fesoasoani lenei ua faaigoaina o le CSSP – muamua ia iai ni faailoga vaaia ma le mausali o ni faamanuiaga e mafai ona tali atu ai i manaoga o vaega faapitoa o le atunuu e vaivai le tamaoaiga ma moomia ni fesoasoani faapitoa.
O le lona lua ia lelei pulega o faalapotopotoga ina ia mafai ona latou faatino atinae mna faaauau pea i le mae‘a ai o fesoasoani e faamatuu atu, ma le lona tolu ia iloga ona amanaia le leo o sosaiete o faalapotopotoga o tagata lautele (civil societies) i soo se faaiuga lava ma faiga faavae a le Malo,” o le saunoaga lea a le tamaitai o loo faauluulu i ai lenei fesoasoani, le Afioga Leiataua Kilali Alailima.
E ese mai i vaega nei e lua ua vaevae i ai lenei fesoasoani, e iai le isi fesoasoani ua tuu atu foi e lenei faalapotopotoga auā talosaga mo tane vai. “O le kuata o talosaga uma ua oo mai i le CSSP e agai lava i le manaoga mo ni tane vai ma o le mafuaaga lea ua aveese ai lava le fesoasoani lenei,” o le faamatalaga lea a Leiataua.
E $4 miliona tala le fesoasoani a le Malo o Ausetalia ua faamatuu mai mo le vaega faapitoa lava lenei o lea fesoasoani. O le lua tausaga talu ai na faamautu ai le fesoasoani lenei a le Iuni a Europa ma le malo o Ausetalia.
Sa iai le faamoemoe e aofia ai ma Niu Sila peitai o le suiga o le faigamalo a Niu Sila ua sui ai foi le vaega ua agai i ai ana fesoasoani. E ui i lea, o le tausaga faaletupe lava lenei e $4 miliona tala le fesoasoani a le Malo o Ausetalia, $4 miliona tala foi le fesoasoani a le Iuni a Europa.
“E lē o talosaga uma e talia auā e iai lava tuutuuga ma aiaiga e tatau ona uia e i latou e talosaga mo nei atinae ma o talosaga nei e ese mai i tane vai, o le tuutuuga tāua lava e totogi e le faalapotopotoga o loo talosaga le 10 pasene (%) o le atinae. O le faataitaiga a $3,000 e faatupe e le faalpotopotoga e ana le talosaga ae o le isi paleni e totogi atu i le fesoasoani a le CSSP”.
Mo le suavai la e le o iai se aiaiga faapea ona o le manatu o le toatele lava o loo agai i ai le fesoasoani lenei o aiga e limavaivai e lē o mafai ona faatau se tanevai ma o loo faatali le suavai maua i paelo ma pakete, ma e mae‘a lelei lava sailiiliga o le tulaga o iai le manaoga o le suavai i lea aiga ma lea aiga a o lei faia se faaiuga poo ai e maua lea fesoasoani.
O le tele o isi fesoasoani ua faatautaia e lenei faalapotopotoga ua aofia ai le fausia o faleaoga aemaise mo aoga e lē o ta‘ua o ni aoga a le Malo – e ui ua iai foi isi faleaoga a le Malo ua avatu i le CSSP fesoasoani mo le fausia ma le toe faaleleia.
O le fausia o fale lē ta‘ua mo aoga, o pa e siomia ai ia nofoaga faapea le faatotogaina o fale aoga nei ma fale o komiti a tina poo faalapotopotoga o autalavou, ua oo lava i ai le lagolago a lenei faalapotopotoga.
O talosaga a isi afioaga e aofia ai fata e tuu ai le otaota ua fausia foi i lalo o lenei polokalame aemaise polokalame faaleaoaoga e faalautele ai le tomai o tagata lautele e saili ai galuega pe faatino ai foi atinae eseese i totonu lava o nuu.
“Ua faalautele lava i soo se atinae mo le manuia lautele o le atunuu ua unai i polokalame nei ae e tatau lava ona manino lelei tagata uma i aiaiga auā ua mautu lava āuga e pei ona ta‘ua i le talosagaina ai o nei fesoasoani”.
Ta‘ua foi e Leiataua o loo galulue faatasi ma le Faamalu o Faalapotopotoga tumaoti i se polokalame ina ia mautinoa e siaki ma toe iloilo le faatinoga o galuega a faalapotopotoga tetele tumaoti o loo tautuaina le atunuu ina ia mautinoa pulega lelei ma le manino o le auaunaga mo le atunuu.
