Ua tatala aloaia nei se tusi muamua, ua tuufaatasia ai solo ma pese na tusia e alo ma fanau i se polokalame na faatautaia e le Mapu Maia ua faaigoaina, “Ioe mo le aiga, leai i ta‘aloga faitupe”, e pei ona alo atu i ai le faalapotopotoga a le Mapu Maia i le Aso Toanai i le faaiuga o le vaiaso talu ai.
O lea faamoemoe na faia i le Dream Centre i Manukau, o se vaega o le polokalame faapitoa a le United Communities e faatāua ai le soifua maloloina lelei o aiga i totonu o Niu Sila ma le autu ia avea o se aso e tetee atu ai i taaloga faitupe.
E pei ona silafia i ni nai tausaga ua mavae, sa faia ai ni polokalame faalauiloa a le Mapu Maia e tauala i se tauvaga tusiga solo ma pese a le fanau laiti e faatatau i le autu “Ioe mo le aiga, leai i taaloga faitupe” lea la ua mafua ai le tuufaatasia uma o nei tusitusiga a le fanau i se tusi e pei ona tatala aloaia i le Aso Toanai na se‘i mavae nei.
Na molimauina le toatele o le mamalu o le atunuu na auai i lenei faamoemoe, auā ua lē gata i lea, ae o se aso foi faamanatu e faataua ai le soifua maloloina lelei o aiga. E tele faafiafiaga auā le silamio o le mamalu o le aofia na auai, aemaise o le anoanoai o faamatalaga ma fesoasoani e mafai ona ofo ai auaunaga eseese auā le nofo silafia o le atunuu i ni auala e foia ai faafitauli o taaloga faitupe.
O le galuega tuufaatasi a le Problem Gambling Foundation of NZ, Asian Family Services, Mapu Maia ma le Choice Not Chance. E tasi le auga o nei polokame ia faalautele le silafia o le atunuu, i le ogaoga o aafiaga e mafatia ai aiga, mātua ma fanau, talu le fiafia i taaloga faitupe.
O le lomiga muamua o pese ma solo a le fanau pei ona tuufaatasia ai lenei tusi, o le a avea lea ma faamaumauga o ni faamatalaga o le a mafai ona faaaogā o se fesoasoani mo tagata lautele o Samoa e fia silafia atili ni faamatalaga e uiga i aafiaga o taaloga faitupe, e pei ona faamanino mai i luga o le upega o faamatalaga a le Mapu Maia.
Ma o le a mafai foi ona maua le kopi o lenei tusi i soo se faaletusi lava i totonu o Niu Sila.
