O le faiva e tapuaia e ae ma le manuia, o le sini ma le autu lea o le faamoemoe na tumutumu ai le hall a le aoga tulagalua a Bailey Road i Mount Wellington i le po o le Aso Toonai ua mavae 27 o Setema i aiga uo ma ē masani faapea le ekalesia o le Worship Centre i le tatalaina o le CD muamua a se tasi o alo o loo galue i totonu o lenei ekalesia.
O le susuga ia Neemia Junior Iese Aunei ua 20 nei ona tausaga ae ua ausia se tasi o laasaga o le soifuaga o loo tele ina moomoo i ai tagata aemaise o le faaaogāina o le meaalofa ma le taleni mai le Atua, ma ua faaigoa ai nei lana CD “Ua nao Iesu le Tali.”
O le ta o le 6 i le afiafi na amata pesepese ai le aufaipese a le ekalesia, ona sosoo ai lea ma le tatala aloaia o le pookalame i le sauniga lotu na taitaia e le susuga i le faafeagaiga ia Avele Tanielu o le tausi matagaluega lava a le ekalesia Worship Centre i Mount Wellington.
Na saunia foi le tatalo faapitoa e le aufaigaluega mo le alii o Neemia Junior e faapaia ai le CD ma le naunau lava o le ekalesia ia faamumū pea le lamepa ma faaauau le taleni ua ia maua. O le fofoga o le po o le susuga ia Joshua Aka Lemisio ma o ia foi sa faafeiloaia le mamalu o le auvalaaulia na molimauina lenei faamoemoe.
O nisi o tamalii iloga o le atunuu i le musika le susuga ia Pagamalie Iopu Faaivalu, Pastor Viliamu Kenese, Lama Mua, Nanai Ofisa faapea le susuga ia Tala Pauga na tuu atu foi o latou tauau e lagolago le faamoemoe o le alii o Neemia.
Sa faapea foi ona saunia e kulupu taitasi a le ekalesia ni aitema auā lava le faamatagofieina o le po faatasi ai ma ata mālie a le alii o Joshua Aka Lemisio e pei ona lauiloa ai i le aoga a Leulumoega i Samoa i faafiafiaga. Sa faapea foi ona faatau ai ma le CD i lea po i le na o le $10.00.
Na taualuga polokalame i le toe sii o le faafetai i le Atua ona ua faataunuuina ma le manuia le famoemoe e pei ona alo i ai le ekalesia ma faaiu ai loa i le taumafataga na tapenaina lava e aiga lotu taitasi. O le tofa ia Laupua Tagialao o se tasi o toeaina o le matagaluega sa fai ma sui o le ekalesia e momoli le faafetai ia i latou sa molimauina lenei faamoemoe aemaise o le aupepese sa lagolago le tatalaina o le CD a Neemia Junior Iese Aunei.
O le susuga ia Neemia Junior e mai le afioaga o Neiafu a o lona faletua e mai le alalafaga o Safai. E 2 tausaga na ia tapenaina ai lana lipine e ala i le tusitusia o pese ma fatu, ae 3 masina na tuufaatasia ai loa ma pueina ai e le susuga ia Lale Talo ma le fale puepese o le Pacific Love e pei ona lauiloa ai i Niu Sila.
Ua iai foi lona faamoemoe o le a faaauau pea lana taleni ua foai mai e le Atua auā se manuia o lona aiga faapea lana ekalesia.
