Ua maua e Aukilani le avanoa e faasoa ma tufa mai ai le afioga a le Atua e ala i aoaoga i mataupu tau i le taitai i totonu o Ekalesia taitasi. Ua leva ona faatalitali lenei itu o Niu Sila poo afea o lea a faasoa mai ai lenei meaalofa ua maua e nisi o alo ma tamafanau o loo galulue i totonu o isi Ekalesia e pei o Napier ma Kalaiesetete.
O le manulauti ma le silasila mamao a lenei aoga o le aoaoina lelei o tagata o loo galulue i totonu o ekalesia eseese ina ia mafai ona galulue ma fesoasoani ia latou faifeau.
Sa auai mai ai foi le taitai o le Assembly of God i Niu Sila le susuga i le faafeagaiga ia Ailaulau Faletutulu, faapea le tamaitai pule aoga o lenei kolisi le faletua ia Rose Fatialofa Sapati ma le susuga i le faiaoga ia Makisua Fatialofa o i latou ia sa malaga mai lalo i Napier e tatala aloaia lenei faamoemoe.
O upu faafeiloai na saunoa iai Pastor James Price, ona pesepese loa lea o le aufaipese a le Ekalesia A.O.G i Papatoetoe ma le team mai Tonga. O se afiafi matagofie ma le gaioi o le Agaga Paia i loto o tagata a o faagasolo le viiga i le taitaiina e le susuga ia Pastor Makisua Fatialofa, faaauau le faauuga i lea po ina ua tautalagia le upu a le Atua e le Peresetene o le aoga poo le taitai o le ekalesia A.O.G i Niu Sila le faafeagaiga ia Ailaulau Faletutulu.
Sa lē toe iai se Iutaia poo se Samaria e ese mai ai i le mafutaga i lea afiafi ina ua tasi tagata uma i le tino e tasi ia Keriso, sa oo foi i le taimi o le inugati sa vaaia ai se mafutaga manaia ma le matagofie i le feofoofotai o tagata i le alofa o Keriso.
O le susuga ia Makisua Fatialofa na saunoa i le tāua ma le manulauti o le King’s Leadership College, e tasi lava lana misiona aoaoina ma le faaaupegaina ma le faamamanaina o taitai mo le a taeao, tapenaina o Ekalesia, o le tele o nisi o taimi e mafaufau ai le Samoa a alu i le aoga Tusi Paia o lona uiga ua sauni e faifeau, ae lē o le aoaoga lena a le Tusi Paia, o le aoaoga e tofusia uma tatou ma meaalofa e faaaogaina ai tatou mo le atinaeina o le tino o Keriso.
Ma ia tatou oo uma i le lotogatasi ma le tautua i le Alii. Ae lē gata i lea o se finagalo ua a‘e i le susuga a le faafeagaiga ia Ailaulau Faletutulu ma le faletua ia Nancy Faletutulu i le tausaga e 2001 na faavaeina ai le aoga ma le faamoemoe ina ia tapenaina taitai i totonu o Ekalesia auā le atinaeina o le tino o Keriso, e fesoasoani i le galuega a le faifeau poo le leoleo mamoe.
Tausaga 2009 o le uluai faauuga lena a le aoga na faavae ai loa le King’s Leadership College i Napier. O le Peresetene o le aoga o Pastor Ailaulau Faletutulu ma le faletua ia Nancy, o Rose Fatialofa Sapati o ia lea o loo pule aoga.
O le Aso Gafua 20 o Aperila ua fuafuaina e amata ai le poloka a le aoga ona o Aukilani e toatele ekalesia Samoa ma ekalesia aPenetekoso e manaomia e faafeagaiga se fesoasoani i totonu o le galuega.
O le talitonuga o loo iai i nei aoaoga, a lelei taitai e faamāmā avega le galuega a le faifeau, pe taitai faili, taitai le autalavou, mafutaga a tina, mafutaga a tamā, o le car paka, umukuka poo le fale taele poo soo se matata lava, e māmā le avega a le taitai o le lafu mamoe.
E 3 lala o le aoga o loo i Niu Sila nei o le ofisa autu lava o Napier o loo faatino ai mea uma lava o le aoga ma lona lala e tasi i Aikilani ma le isi i Kalaiesetete. E fā lala o loo i Ausetalia, 3 o loo i Sini ma le 1 i Melepone.
O le tausaga ua mavae na faauu ai tamaiti aoga e 113 i Sini a o lenei tausaga o loo vaavaai ai i le 200 tamaiti e faauu. O le aoaoga a le aoga e lua gagana o loo faaaogāina ai; o le gagana Samoa ma le faaperetania ona o le vaai alofa i alo ma fanau o Samoa sa fananau i Samoa ma Niu Sila nei.
O se avanoa lelei foi i taitai o le lafu mamoe e tuuina i ai le pule e o ai e faatino ma taitai le galuega, ae tāua ai le lagolago a le taitai ina ia faataunuu le latou faamoemoe.
Ae na saunoa le tamaitai pule ia Rose Fatialofa Sapati o le tāua ia te ia talu ona tatala le aoga, o le avanoa ua mafai ona faasafua i soo se tasi. Ua iai foi lona talitonuga e leai lava se tasi e leai sona aogā i totonu o le galuega a le Atua.
O le tāua foi o le aoga e lē na o le faifeau ae tele matata e aogā ai mo le tino o Keriso. E aogā le ola tautua a o lei oo atu i le taitai, o le ala i le pule o le tautua.
Faaamalosiau le pule aoga ma le susuga ia Makisua, i tagata e aua ne‘i poloka le aoga i le lē lava o le seleni poo nisi faafitauli o le olaga, o se taimi lea e fesoasoani ai mo le tagata lautele ina ia maua le onosai i soo se vaega o loo galue ai.
O faiaoga o le susuga lava i le taitai aoao o le Ekalesia ia Pastor Ailaulau Faletutulu faapea le susuga ia Isaia Lameta o loo faifeau nei i le Ekalesia Peace Chapel i Henderson faatasi ai ma nisi o faifeau.
