O le tele o tausaga e tatala ai CD fou ma DVD fou a le susuga ia Asuao Felise Mikaele i totonu o fale faafiafia poo fale kalapu, a o nei faafiafiaga e seāseā agai atu i ai nai tuaa matutua e faalogologo i ai auā e faigata ia latou ona feoai auā ua matutua foi o latou soifua. O le tele foi o fatuga a Asuao e fiafia ai tele le au faitau‘aso ma le au fai mafaufauga o loo taputapuai i maota ma laoa, poo le ā lava ni pese o loo i CD tuai e fiafia ai lava nai tagata matutua auā e maalie toe suamalie i le latou faalogologo.
O le Aso Faraile ua mavae na tapuni ai e Felise Mikaele faitotoa o fale kalapu mo ana faafiafiaga ae tatala ai le faitotoa o le shopping centre a Magele mo ana faafiafiaga mo le lautele o le atunuu.
E tasi lava le naunautaiga o lea tamalii se‘i ona taumafai e faafiafia i tuaa matutua auā e lē mafai ona agai atu i fale kalapu, auā na ona latou faalogo i pese i luga o ualesi faasalalau ma CD ae lei mafai ona vaai i lē o loo ia faatinoina le galuega.
O le mālie ma le lolo o pesega, na matuā faatumulia ai le taulaga faatau i Magele i tagata matamata, e fai o tupulaga talavou a o tuaa matutua.
E tosotoso atu lava le isi toeaina i le wheelchair, o le isi loomatua e tau laalaa atu i lana walker e faamalie le maimoa o mata ma le fia faalogo i pesega malu. O le avanoa lelei foi ua maua e le toatele o le atunuu e maimoa ai auā e lē mafai ona auai atu i falekalapu pe a utiuti le tala i le seleni.
O le tāua o lea aso e maua ai le faamalositino i pese vave, auā e lē misi lava le kepu o vae o toeiina ma loomatutua, ua alu ai foi i lalo le toto maualuga ma le suka, ae faapea foi ua maua ai se auala e tafafao ai e ese mai ai le nonofo i le fale.
Sa vaaia le fiafia o nai tuaa matutua i faafiafiaga, aemaise ai o le latou molimanao i isi pese e fia faalogologo ai lava e pei o le Loimata i le tuugamau, Afuli mai lou tua, ma le Zumba o loo i totonu o lana CD fou e 28 lea sa faatauina ai foi i lea aso faatasi ai ma lana DVD fou.
Ae na faaali le agaga fiafia o le susuga ia Asuao Felise Mikaele i lona vaavaai atu i le laufofoga fiafia o tagata ma le lē malolo le sisiva pe a usu ana pese aemaise ai foi le molimanao i ana fatuga, ma o iina na ia lagona ai le tāua o lana siou lea ua fai i totonu o Magele ma le lagolago a le atunuu.
O le volume 28 a Asuao ma lana DVD fou lea ua sau nei i tua, ma ua iai ma lona faamoemoe mo Ausetalia i le ogatotonu o le tausaga i se isi ana faafiafiaga faapenei.
