O se aoga faapitoa mo le aoaoina o alo ma fanau i le Tausaga 11, 12, 13 ua faatuina nei i Otahuhu ua faaigoaina o le PASS poo le Pacific Advance Senior School.
O se visiona na tuu faatasi e le Matagaluega o Aoga ma le Pacific Peoples Advancement Trust (PPAT), o se komiti faafoe o loo taulamua ai le susuga Laauli Michael Jones, ma nisi o taitai o le Pasefika, Emeline Afeaki Mafileo ma Hamish Crooks.
O le aoga a le PASS o le uluai aoga lea ua faatuina mo le aoaoina o fanau Pasefika, i se auala e faapitoa ona malamalama ai tamaiti Pasefika ma manuia ai a latou aoga.
O loo faaaogāina se faavaa (framework) o aoaoga e faatāua ai a tatou lava tu ma aganuu faa-Pasefika aemaise le taumafai ia tapue agaga ma mafaufau o tamaiti i se auala latou te faatāua ai le aoga, aemaise ia manuia a latou taumafaiga.
O le NCEA Level 1 & 2 o loo aoaoina e amata mai le Tausaga 11, e aoao ai le Igilisi, Matematika, Saienisi ma le PE.
E pei ona silafia, ua maitau e le PASS e lē fetaui uma aoga mo ituaiga tamaiti eseese, ae ua latou faaautuina se auaunaga fou e ese mai aoga lautele o loo iai nei. O auala e faatino mo le lelei o le aoaoina ma le fiafia o tamaiti Pasefika i le aoga, e iai le siosiomaga o le aoga, ua fesoasoani tele lea mo le manuia o a latou aoga. E le gata e pasi le NCEA, ae ia avea foi o tamaiti malolosi, toa, ma ia aoaoina lelei ia avea ma taitai.
Na auai ma saunoa le Minisita o Aoga, Honorable Hekia Parata faapea le failautusi o le Matagaluega o Aoga, David Seymour i le sauniga faapitoa lea na faataunuuina i le Aso Lulu o le vaiaso na tea nei.
Sa tatala aloaia e le Purinisese o Tonga, Her Royal Highness Princess Mele Siuilikutapu le aoga, ma ia momoli le faamalo ma le faafetai i le Matagaluega o Aoga, aemaise le komiti faafoe a le PPAT.
O nisi o auala tāua o loo faatino e le aoga e pei ona ta‘ua e le susuga Laauli i lana saunoaga, e saunia e le aoga taumafataga o le taeao ma le aoauli mo tamaiti, e aai faatasi ai ma faiaoga. E fai faatasi latou lotu i taeao uma taitasi, e usu latou pese, e pei lava o se aiga, e faaigoa faiaoga o Aunties ma Uncles, ma le puleaoga ma lona faletua, o Tamā ma Tina.
O loo aoaoina ai le amio faaaloalo ma le āva. E lē faalogoina ni upu leaga poo le tuu i lalo o tamaiti, ae maua le upu faamalosi ma le taumafai ia fautua tamaiti mo le lelei.
Sa usuina se pese faapitoa a tamaiti aoga i lea aso, mai le Salamo 27, “O le Alii o lou malamalama ia ma lou olataga, o ai ea se ou te fefe ai”, o se pese na a‘oina ma taina e Nainz ma Viiz Tupai, ua lauiloa i Niu Sila ia la taleni pese, le aufaipese a le Adeaze.
O puleaoga a le PASS o le susuga ia Falefatu Enari ma lona faletua ia Parehuia. E na o le fā masina na tuufaatasi ai le aoga mai ia Novema 2014, ae o le taimi nei ua tusa ma le 40 i latou ua lesitalaina ma ua amata nei o uluai tamaiti aoga, talu ona amata i le 3 vaiaso talu ai mai ia Fepuari 2015.
E pei ona faailoa mai e Laauli, o loo iai le faamoemoe, ia maua se 100 o tamaiti aoga a le PASS i le tausaga nei, ma o loo tatala pea le avanoa e faaulu atu ai pea nisi o tamaiti i le aoga. Mo nisi faamatalaga, vaai le upega tafailagi www.pass.school.nz pe vili le numera 09 2760375 pe asiasi ane i le latou ofisa i le 42 Atkinson Ave, Otahuhu.
