O le mataituina pea o le faagasologa o aoga mo alo ma fanau o loo aoaoina i totonu o Aoga Amata, o loo faaauau ai pea aoga mo faiaoga o Aoga Amata i totonu o le atunuu.
O lea faamoemoe a le Matagaluega o Aoga, Taaloga ma Aganuu, o loo galulue faapaaga ai ma le Fono Aoao o Aoga Amata i Samoa e ala lea i le ofoina o le fesoasoani mo Faiaoga uma o Aoga Amata i totonu o le atunuu.
I le faataunuuina ai o lea galuega faapaaga, na faataunuuina ai loa lea polokalame i le Hall a le Aoga Faafaiaoga o Aoga Amata i Sogi.
E lua aso na faataunuuina ai lea polokalame ma le faamoemoe ina ia toe faafouina ma faamanatu tomai ma agavaa o susuga i faiaoga, a o lei amataina le aoaoina o alo ma fanau iti i Aoga Amata i lenei tausaga.
O le manatu maualuga o le Matagaluega o Aoga, Taaloga ma Aganuu, a mautu le faavae o le ola aoaoina o fanau mai le amataga, o le a faapena foi ona lelei le ola tuputupu a‘e o fanau i isi laasaga uma o lona ola taumafai i le lumanai.
E sili atu ma le 100 Uluaoga ma Faiaoga o Aoga Amata na auai i le aso muamua, ae 98 Uluaoga ma Faiaoga na auai i le aso lona lua.
O faiaoga nei mai i afioaga uma o loo iai Aoga Amata i Upolu faapea le motu tele i Salafai.
Na aofia i nei aoaoga tomai ma agavaa mo le faafoeina o nai fanau e iai manaoga faapitoa (Special Needs Children) faatasi ai ma le talia o ia fanau i totonu o soo se aoga poo Aoaoga Sauoo (Inclusive Education) a ua lē toe faaesea pe faapito foi lo latou aoaoina.
Sa toe faamanatu ai foi Aoaoga Faamātua (Parenting Education) mo le vaaia lelei ma le tausiga lea o fanau a o lei auina mai i Aoga Amata.
E iai le talitonuga, o faiaoga muamua lava o mātua, ma a ola maloloina fanau, o le a atamamai foi ma popoto i latou.
O nisi ia o vaega na iai le naunautaiga o le Matagaluega ina ia mafai ona ausia auā lona faaaogāina:
• Fuafua mataupu e faaaogā ai auala fesootai
• Tapena alaga‘oa mo le atinaeina o fanau uma
• Iloilo tomai ma agavaa o fanau, faamaumau ma faila (children’s portfolios)
• Silafia metotia ma nisi auala e faafoe ai fanau e iai manaoga faapitoa ma ia aofia i aoaoga sauoo
• Faamalosia ma faaauau aoaoga faamātua
O loo iai le faamoemoe e faaauau ai pea le fesoasoani e ala i asiasiga ma fonotaga faagasolo o lenei tausaga faaleaoaoga.
