Ua tini le uto e pei o le faiva i vai ina ua tau lau o le faamoemoe sa lupe ma taupoina. O se aso matagofie e pei ona faatasia ai aiga ma uo o le afioga ia Tauiliili Ata ma le faletua ia Elisapeta Malifa.
O le tau gaga ifo o le la i le afiafi o le Aso Toonai aso 3 o Novema, na fesagai ai aiga ma uo e molimauina le tatalaina aloaia o le CD o tala pupuu faasamoa a le afioga ia Tauiliili Ata ma le faletua ia Elisapeta Malifa ua faaigoaina “Ia e agalelei i ou uso a tagata”.
O lea faamoemoe sa faataunuuina i le hall a le Ekalesia EFKS Southwest, susuga i le toeaina taitai o le pulega a EFKS a Saute, Rev Tauaaga ma le faletua ia Senerita Mataafa.
O le afioga ia Tauiliili Ata Malifa o loo avea ma convenor o le polokalame Samoa i le leitio a 4EB 981 FM i le taimi nei, o loo galulue ai ma le faletua ia Elisapeta ae o se tasi o tamā matua ua afu lana tautua i tulaga tau faasalalau e pei ona faauluulu foi i ai le leitio o le Siufofoga o le laumua i Ueligitone a o lei malaga mai i Brisbane i le 1995.
E lē galo le alofa ma e olaola pea galuega. O le tatalaina o le la uluai CD o tala pupuu, na faapea ona auai mai ai se tasi o a la uo mamae i aso ua mavae, le fetalaiga ia Tiatia Ieti mai le NiuFM i Niu Sila, sa o la galulue i le Siufofoga o le Laumua i Ueligitone.
E le gata i lea o si ona uso le fetalaiga ia Lavea Lemalu Tupuola Sione Malifa o ia sa fai ma fofoga o le po, na malaga mai Samoa, o loo lauiloa foi i nisi o matagaluega a le atunuu.
O le auga o aute o lenei CD ia suia foi le faafofoga aemaise lava nai tuaa sinasina. E fetaui lelei lenei faamoemoe auā e fiafia tele nai tuaa sinasina i ituaiga ata pupuu faapenei.
E tele nisi o malo faaaloalogia na mafuta atu i le po o le Aso Toonai e pei o faafeagaiga ma o latou faletua, taitai o mafutaga ma faletua, tamā ma tina matutua, tupu ma tamalii o le atunuu faapea le aufaigaluega a le leitio 4EB, o uo foi ma ē masani na mamalu ai le faamoemoe.
O le tofa ia Samoata Peleti Lemalu sa fetalai e molimoli se agaga faafetai i tapenaga matagofie.
Na sioa le aumaimoa i faafiafiaga aemaise o le aga malie o le MC e fesuiai aga o le po i ana tala mālie auā le faafofoga a le auvalaaulia.
Na fai lava ma sui o aiga na lua le tofa ia Lavea Lemalu Tupuola Sione Malifa e faafetaia Tumua ma Pule ma le mamalu o le atunuu sa auai, ona faaiuina lea i se tatalo sa saunia e le susuga i le faafeagaiga ia Pastor Tagaloa Fanene ma taape ai le filialii.
