O lea ua aloaia le tapunia o auaunaga faafomai ma tausi soifua i le falemai tuai o le Tupua Tamasese Meaole i Motootua. O le aso muamua o Fepuari, le po o le Aso Sa na faatino ai loa le galuega tele o le la‘u o meaafale o loo totoe mai i le falemai tuai i Motootua lava.
O le paganoa lea ua maua auā le tapena ese ai o le aufaigaluega o vaega ia na totoe le faatinoga o le latou auaunaga mai i le falemai tuai o le Tupua Tamasese Meaole i Motootua.
O nofoaga ua autasaga o taofia ai ma‘i, aemaise le vaega tausavali ma o le taimi mulimuli lava lenei o le faagasolo lelei o meafaigaluega o le a teuina ma faaaogāina i le falemai fou.
O le malo o Iapani lea na fausia ia faleamai tuai ma o lea la ua aloaia nei le tapunia auā fuafuaga o loo fia fai i ai a le matagaluega ae o le au tausavali ma potu tigaina ua faamautu nei i le fogafale alalo o le falemai tele fou lea na fausia e Saina ma na tatala i le tausaga na tea nei.
Faaalia foi e le alii Ofisa Sili o le auaunaga faafomai i Samoa le afioga Leota Laki Lamositele, o le faamuamua e pei lava ona sa sau ai i le auaunaga lenei, e mo i latou ua tigaina i le faagasologa o i latou e oo atu mo le vaaiga o le fomai ma o le a faamalosia lava foi le taumafai o le auaunaga e tali atu i mafatiaga ogaoga.
O se tasi o mataupu e laga pea e nisi e faatalitali le fomai i le nofoaga o le au tau savali. Faaalia e Leota Laki, o le toatele lava e faaseā o le umi o le taimi e faatali ai ae o le faamuamua lava ia, e tusa pe na vave atu le tagata, ae oo atu loa se gasegase tigaina o iina lava e ave i ai le faamuamua, ma e tatalo ai i le onosai o le mamalu o le atunuu ae o le taumafaiga ina ia aua ne‘i umi tele le faatali a le atunuu i le siaki o i latou.
O ā lava suiga o le a molimauina i lenei nofoaga, e iai lava vaega o le a matauina ai pea le lagalagā ai o faitioga ma fautuaga a le atunuu ae o le tulaga lava ua mautu, o le a tele atu le nofoaga e faatalitali ai fomai, mamā atu, malu ma ea malulu. O loo faaauau foi le talosagaina lava o le atunuu e tausi lelei i nei nofoaga e pei foi o le aufaigaluega ua agai nei i le falemai fou ma o le au tausavali ma le vaega o ma‘i tigaina.
