Ua faalauiloaina mai i pepa o faamatalaga i le amataga o lenei vaiaso le tapena atu o le Mafutaga a Marist St Joseph’s Sports Club, Inc. (“MSJ Sports Club”) e faamanatuina le 45 tausaga talu ona faavaeina mai i le tausaga 1970. E ui mulimuli ane faatoa resitaraina aloaia, ae o le anofale lava o mafaufauga i le foafoaina mai o lenei moemitiga na afua mai lava i le tausaga e 1970, i le faavaeina o lenei mafutaga ina ua tulai mai se mataupu o loo aafia ai ni kalapu a Malisi lava ia se lua, ma o se vaaiga lē talafeagai lea i se atumotu laitiiti e pei o Samoa, o le lua o Kalapu Lakapi a Malisi sa iai muamua, le Marist Rugby Club Mulivai ma le St Joseph’s Rugby Club i Lotopa.
O le St Joseph’s Rugby Club na amata mai e Bro Casmir Foley i le vaitau o le onosefulu 60’s e agai atu i ai alii taaalo ua o ese mai le Marist Rugby Club i Mulivai, lea sa faiaoga ai Brother Finton sa lauiloa i ia aso ia “Pat Buckley” ma avea ma taulaiga ona o le malo soo i le talita o taaloga i lena vaitaimi, ma ua pei ai o loo iai se malosiaga e tosina atu i ai tama taaalo.
I le tausaga 1970 o le taimi tonu lea na tulai mai ai loa ni taaloga i le sailia e Marist Rugby Club i Mulivai ma Moaula Rugby Club le sailia o le au e pau peitai e emo ane le ata, e toe taaalo lava Marist Rugby Club ma St Joseph’s Club e saili ai le manumalo.
Na iu le taaloga ma manumalo ai St Joseph’s Rugby Club, ma e pei la o i tonu lava na afua mai ai le Marist St Joseph’s Sports Club, ina ua tulai mai se feteenaiga. Ae faafetai auā o le tausaga lava lena na tasi ai le tofa ma le faautautaga ina ia taulai loa i se mea e tasi, e lē toe tulai mai ai se feeseeseaiga mulimuli mai, aemaise ai lava o le faatumauina o le malosi o kalapu a Malisi i lena vaitaimi, aemaise ai lava le Lakapi a Malisi lava ia.
O se tasi o alo fanau a Malisi ia Herbert Clarke, o se alii Loia foi i lena vaitaimi na ia faatinoina le tuufaatasia o nei kalapu e lua sa iai ina ia Tasi. Ina ua mae‘a le tuufaatasia ona tofia loa lea o John Maihi ma Brother Clement e avea ma faiaoga o Au, ma amata tauaveina loa le igoa “Marist Rugby Football Club”
O le toe faaopoopoina i ai o le igoa “St Joseph’s” mulimuli ane i le igoa o le Kalapu o le naunautaiga i nisi sa aotauina i le aoga a St Joseph’s e taaalo mo Malisi ae lē o ‘Au a afioaga ma nuu ua masani ai, ma o le mafuaaga lena na fanau ai loa le igoa “Marist St Joseph’s Sports Club”.
Ma sa amata mai ai loa i se nofoaga faatauvaa i Alafua i le mea tonu lea ua faavaeina ai nei le Don Bosco i Alafua. O nisi nei sa latou tau amataina mai le MSJ Sports Club: Felise Vito, Aki Ripley, Iafeta Ekeroma, Ioane Sinuki, George Meredith, Jimmy Fruean, Rick McFall, Peter Shuster, Lino Passi, Norman McDonald, Rudy David, Gordan Bartley, Steve Stanley, Herbert Clarke (Manager) Petelo Lepou, Eneliko Ah Voo, Jeffrey Atoa, Geroge Stowers, Henry Penn, Maligi Sefo, Maluelue Tafua, o le toatele o i latou nei sa filifilia i Aulakapi a Samoa i taaloga faavaomalo i le Lakapi.
O isi sui na fofoa mai lena lava kalapu e pei o Brian Lima, o le auso o Leamy, Kalolo, Aleki ma Michael Toleafoa, David Lemi, Peter Fatialofa, Etuale Sefo, Malaki Iupeli, Sila Vaifale, Lio Falaniko, Afato Sooalo, George Stowers, le auso o Feleti, Henry, Alesana, Anitelea ma Vavae Tuilagi, le masaga o Lalovi ma Laulala Langkilde, le uso o Ene ma Paniani Kapisi, le auso o Mefi, Toetu, Arona ma Nikotemo Palamo, Ulia Ulia, Henry Williams, Afa Aiono, Ofisa Treviranus, Uale Ma‘i, Faatoina Autagavaia, Maurie Faasavalu, David Schuster ma Tavita Sio, o i latou uma nei na taaalo foi mo le ‘au tele a le atunuu, le Manu Samoa.
O Brian Lima, ua na o ia lava se tama taalo o le Manu Samoa ua aofia lona suafa i le “Rugby’s Hall of Fame”, ae o Uale Ma‘i o le uluai Samoa lea na filifilia e avea ma “IRB Player of the Year i le IRB 7’s, faatasi ai ma nisi o aiga Malisi sa aooga i Samoa peitai ane ua filifilia i le ‘au tele a Niu Sila e pei o John Shuster, Sosene Anesi, ma Nepo Laulala.
O le uluai Palemia o Samoa ia Mataafa Faumuina Mulinuu II, sa taalo foi mo Malisi, Su‘a Fritz Thomsen, Tuilaepa Sailele Malielegaoi le Palemia o Samoa i le taimi nei ma o le taitaifono o le Iuni Lakapi a Samoa. O Lefau Harry Schuster, Pepe Christian Fruean, Rudolph Montini Ott, Ropati Kapisi Sir Toby, Sepulona, Siaosi, Salale, Okesene Moananu, faatasi ai ma le anoano o isi o le aiga Malisi ua ta‘uta‘ua ai le Malisi i ona talaaga i taaloga o le Lakapi.
O le faamanatuina la o le 45 tausaga
1 Faatāuaina ai lona sao i le Lakapi i Samoa
2 Manatua ai i latou na mua i malae i Kalapu a Malisi
3 Faafetai ai lagolago a nisi o Kamupani ma Pisinisi lagolago
4 Saili ai seleni mo galuega fesoasoani mo atinae lelei i lotoifale o le Kalapu a Malisi.
Polokalame o le faamanatuina
O le solo tele i le taulaga Apia a i latou sa aotauina i Malisi i tausaga ua mavae ma taimi nei, Samoa ma Atunuu i Fafo i le Aso Faraile, 30 Oketopa 2015 i le taeao.
Tusigaigoa o alii taaalo i le Eleele Fou 10am – 3pm (Faasalalau i luga o le Leitio, Aso Toonai, 31 Oketopa. Aso taalo a le Aiga Malisi i Lotopa i le taeao, ae taualuga i le Cocktail Party Aso Toonai i Lotopa amata 4pm i le afiafi.
Taualuga i le Misasa Paia i le Aso Sa, 1 Novema i Mulivai Cathedral.
Mo nisi faamatala i lenei faamoemoe, faafesootai
Laulu Henry Taefu: 7574730 poo le henrytaefu@samoa.ws
Toomata Sita Leota: 7712777 poo le sita.leota@gmail.com
Misa Vicky Lepou: 20072 / 7515090 poo le v.lepou@gmail.com
