E lē faapito manū ia tasi, ae o se avanoa ua faalautele mo susuga i faafeagaiga mai Ekalesia eseese o atunuu o le lalolagi e mafuta ma faamalosiau ai le isi faafeagaiga i le isi faifeau, ma o se faatinoga foi lea o le upu, aua le tuua le mafuta faatasi o le fanau a le Atua.
O avanoa ua tatala mo Ekalesia uma, e aofia ai le Metotisi, EFKS, Katoliko, Assembly ma soo se Ekalesia. O atunuu e aofia ai o Amerika, Tutuila, Samoa, Niu Sila, Ausetalia, Hawaii ma isi atunuu o le lalolagi.
O se mafutaga poo se sootaga a faafeagaiga ma o latou faletua ua faaigoaina o le Samoan Pastors International Network, lea ua 15 nei tausaga talu ona faavaeina mai. O se feau momoli ma se anavatau o lenei faatasiga, ina ia felosipi faatasi ma faamalosi ma aoaoina le upu a le Atua i totonu o le mafutaga, ia atinaeina ma faamalosia le aufaigaluega i lo latou valaauina.
E lē faatusatusa ai ni talitonuga poo ni ekalesia, e lē faatusatusaina agavaa poo tomai, a ia soloia pa o tapuaiga ua saisaitia ma feeseeseai ai le aufaigaluega.
O tausaga uma lava e faataunuuina ai lenei polokalame mo susuga i faafeagaiga ma o latou faletua lea e faia pe a mae‘a le Aso Sa o tamā i tausaga taitasi, ma o se avanoa lelei ua mafai ona galulue faatasi ai le aufaigaluega totofi a le Atua, ua lē gata i le upu folafola ae o se taimi lelei e o faatasi ai e taaalo ma miomiō faatasi, auā o nisi ia vaega o le soifua galue o le tagata, lea ua taimua ma taulamua ai susuga i faafeagaiga i nisi vaega e ono atiae ai le Ekalesia poo tovine a le Atua.
E afua mai mauga manuia o nuu ma Ekalesia faapea ma aiga, e lē o tamau foi lenei mafutaga i se atunuu se tasi e faataunuuina ai lenei mafutaga, o loo faasolosolo lava i atunuu eseese.
O le tausaga lenei o loo tapenapena ai le Ekalesia o le LifeChurch 24-26 Maich Road, Manurewa, a le susuga i le faafeagaiga ia Lui Ponifasio ma le faletua ia Ane Ponifasio ma le Ekalesia e talimalo i le mafutaga o lenei tausaga.
O lenei faamoemoe o le a amata i le aso 7 o Setema seia oo i le aso 11 o Setema 2015. E tasi le vaiaso e faagasolo ai lenei faatasiga, ma e iai le faamoemoe e silia ma le to‘a 200 susuga i faafeagaiga ma o latou faletua o le a auai faapea foi ma nisi o alo o nei faafeagaiga.
Ua iai foi le naunautaiga ma le agaga maualuga o susuga i faafeagaiga ma o latou faletua mai atunuu eseese i lea vaiaso, o le a toe feiloai ma mafuta ai, auā e seāseā maua lenei avanoa i masina taitasi.
Ua mae‘a foi ona faataoto e le komiti faafoe le polokalame o le vaiaso e faatinoina ai le faamoemoe. O aso taitasi o le a amata i le itula e 9 i le sauniga lotu i le taeao, ona sosoo lea ma le vaega muamua, ona alo lea i le malu taeao.
O le aoauli o le a toe faaauauina ai le vaega lona lua i ni mataupu se lua, sosoo ai lea ma le taumafaaga. O le a maua le malologa i le aoauli ona toe faaauau lea i le itula e 7 i le afiafi, ma o nei polokalame uma, ua mae‘a ona tofia susuga i faafeagaiga e nafa ma vaega taitasi.
O se avanoa e faafofoga ma fetufaai ai leoleo mamoe i ni auala e atiae ma faamalosia ai totonu o Ekalesia o loo galulue ai. Ae lē gata i lea ua iai ni semina faapitoa i totonu o aso taitasi, ma o le a faatinoina lea faamoemoe mo alo ma fanau a faafeagaiga o le a auai, ae o le a faasafua foi lea avanoa mo fanau uma e fia auai ma aoaoina i le Afioga a le Atua.
O le tausaga muamua lenei ua ofi mai ai le mafutaga lenei a fanau ua faaigoaina o le Pastor’s Kids Network a fanau i totonu o lenei faatasiga. O le silasila mamao a faafeagaiga mo fanau ia latou iloa ma malamalama i le latou pitolaau e mafai ai ona fesoasoani i le galuega a o latou mātua o loo tausia le lafu mamoe.
O le tāua foi o lenei sootaga o le a silasila ai i meaaalofa ua tuuina i tagata taitasi, e pei o faiaoga, failauga, o perofeta ua foaiina i ai e le Atua. Saunoa Pastor Chris Sola o le failautusi o le mafutaga, o le polokalame foi lenei o le a faaaogāina uma ai susuga i faafeagaiga tamaloloa faapea ma faifeau tina, auā e lē o faasāina le lauga o tina, o le a mafai foi ona tutulai i le taitaiina o viiga.
Ae o le tele o tausaga o loo maitauina ai pea le faaopoopo o susuga i faafeagaiga ma o latou faletua i totonu o lenei mafutaga ma o le maualuga o lenei faamoemoe i le lalolagi ua siitia ai le fuainumera o faifeau o loo auai, aemaise lava o le fiafia e mafuta faatasi ma fetufaai ma taaalo faatasi.
E galulue faatasi mea uma mo e alolofa i le Atua.
