O toe sauniga o le afioga ia Muliaumalu Senio Piliae i Doonside, i Sini Niu Sa Uelese na faatumulia i aiga uo ma ē masani ae na maualuga ma aloaia i le toai taunuu mai ai o le sa mai Samoa i le lato i le ea ma le lato i le tai a le Afioga i le Ao Mamalu o le Malo Afioga Tui Atua Tumua Tamasese ma lana Masiofo ia Filifilia Tamasese. Sa avea foi le molimau a le Ao Mamalu o le Malo ma autu o toe sauniga o lenei tamalii o Leulumoega ua lausilafia i Sini Ausetalia i upufai a aiga ma le itumalo aemaise pe a potopoto Samoa i Ausetalia.
I le sauniga na faia i le malumalu Katoliko Roma lava i Doonside sa tapuai ai ma le faletua ia Tuigamala Fetu Piliae ma le aiga sa malele ai foi se molimau ola a le afioga i le Tui Atua i le tofa ma le fetalaiga sa faaaupegaina ai e le Atua le tootoo ua amia.
“O se faataitaiga o le soifua o Muliaumalu o le fetalai ma faatino galuega sa ia fetalai ai. O se mafutaga mafana ma le vavalalata sa matou ola faatasi ai ma aotauina ai foi a‘u i nisi vaega o le aganuu.” E faapea molimau a nai ona aiga ma le fanau faavauvau. E sefulutasi o la alo ma le tausi ia Tuigamala Fetu Piliae, selau luasefulufitu le aofai o la suli. O se tasi foi o sui tauoloa a le Fono Aoao a Tagata Samoa mai tausaga ua tuanai a o gasolo mai tagata Samoa mai Niu Sila ma Samoa e aumau iinei ma sa fesoasoani i ai.
Na vaaia foi le tagi mai ala o nai ona tauaiga mai le malo tele o Toga i lea aso ma la latou faatupu. O aiga mai Niu Sila ma isi setete o Ausetalia na aofaga potopoto foi mo lona toe sauniga.
Sa auai foi sui o le malo o Samoa i lana afioga a le Sui Hai Komesina Fata Brian Kaio ma le afioga i le Konesula, Tofa Manogiamanu Fonoti Etuale Ioane.
Na mae‘a loa toe sauniga i le fanuatanu i Pinegrove Rooty Hill sosoo ai ma le taumafataga tele i le RSL a Penrith. A o tali le sua a le paia ma le mamalu o le aofia na sauni foi le aiga e molimoli ma faatautaia faaaloaloga masani ai a le atunuu ma na atagia ai pelega o le tamā ua malaga i le teu faatupu ma le teu faatamalii.
O le Aso Sa na sosoo ai na toe taliu ai le faigamalaga a le afioga i le Ao Mamalu o le Malo ma le Masiofo.
