E silia i le 300 le aumalaga a le Faasinoti a Aukilani Matu ua sauni atu nei mo Samoa i le faamanatuina o le atoaga o le 50 tausaga a le Eakalesia Metotisi. O susuga i faafeagaiga ma o latou faletua faapea usufono filifilia o matagaluega, faatasi ai ma sui usufono, aemaise o sui taitasi o le aulotu lava latou o loo malaga i le faamoemoe i Samoa.
E 23 matagaluega ua mafai ona tuufaatasi ma tapena ai le malaga. O loo aofia ai foi ma le autaaalo e 30 a alii mo le taaloga o le kirikiti faapea auvoli a tama ma teine. O le faatupeina o pasese a le aumalaga o loo galulue ai lava le matagaluega latou i o latou sui o loo malaga i le usugafono.
O le Aso Toonai 21 o Iuni na lē ofi ai totonu o le maota o le matagaluega a Manukau i mātua ma sui o aulotu taitasi, o ē ua lē mafai ona malaga i Samoa, ae na agai atu ma molimau le pese a le Faasinoti ua tapena mo le faamoemoe. O le afioga ia Faamatuainu Fiu Aiga Maua na fatuina le pese ma o ia foi o loo taimia.
Na faalauiloa ai foi togiga ua tapenaina e nisi o kamupani auā lava le faamoemoe o le Ekalesia i Samoa. O le WE Accounting & Business Services Ltd, Ese Tatupu Funeral Director, Alignz Recruitment, BNZ, Westpac Bank ma le Eazy Money o kamupanu nei ua mafai ona sosoo tau‘au atu ma lagolago i togiga taalo faapea togiga e faaaogā i le pese.
E lua vaiaso o le usugafono, ma e nonofo faatasi foi le malaga i le maota o le faasinoti a Matu i Faleula, ma ua iai le faamoemoe o le aso 5 o Iulai o le a umusa ai ma le isi o latou maota fou a o lei amataina le koneferenisi.
O le faasinoti a Aukilani i Matu o le a latou tatalaina faafiafiaga o le usugafono i le aso 14 o Iulai.
