O le Fiva Rumatika o le tasi lea o faama‘i ua tele ina vave ai soifua o nisi o le atunuu ona o le lē iloa o fofo ma auala e foia ai, o le mafuaga lena ua a‘e ai se lagona i le tautua ma le auaunaga a South Seas Health Care, ia faia se polokalame mo tagata Pasefika aemaise o tagata lautele ina ia nofo malamalama i auga o le fiva Rumatika.
O le South Mall i Manurewa na faataunuuina ai se polokalame a lenei kamupani mo le atunuu ina ia resitala ma malamalama i auala ma fofo e foia ai lenei faama‘i. O le taeao o le Aso Tofi 26 Iuni na tumutumu ai le taulaga faatau i Manurewa i tagata o le Pasefika aemaise o tagata mai isi atunuu na agai atu ma molimauina lenei faamoemoe tāua mo tagata lautele.
O le tofa ia Toleafoa Shon Tautali sa fai ma fofoga o le aso ma o laua foi ma le faletua ia Jean Leasi o loo faauluulu i ai lenei polokalame aemaise o tamaiti e maua i le tino lapopoa. Sa mafai ona faatasi atu i ai le susuga ia Aumua Toovaega ma Sunita Nua o loo faatautaia le polokalame o le taofi le ulaula tapaa ma le taaalo i taaloga faitupe.
O vaega uma ia sa mafai ona faalauiloa i totonu o lenei faamoemoe i Manurewa. O le toatele o tagata sa molimauina lenei polokalame, sa mafai ona faatalatalanoa e le aufaigaluega ma faapupula i ai fofo ma auala e foia ai lenei faama‘i pe a maua ai fanau.
Sa resitalaina foi o latou suafa ma tuuina i totonu o le se‘i auā faailoga na tapenaina e le aufaigaluega. O se tasi o tamā o le atunuu e suafa ia Soloi Lemauga sa fesoasoani tele i lenei faamoemoe ona sa ta‘ua e le tamā, sa iai lona alo na maliu ai i lenei faama‘i.
O lona tiute la o le faia o faamalosi tino (zumba) mo tagata ma molimau i ai i le mea na tupu i lona alo e 23 tausaga. Ae na ta‘ua e le faletua ia Jean Leasi o le tautua ma le auaunaga a le South Seas Health Care, o loo galulue nei mo le komiuniti i Ekalesia aemaise o faalapotopotoga eseese.
Sa faafiafiaina le mamamlu o le atunuu na auai ina ua tatagi leo mālie mai kikatara ma ukulele a le mafutaga a tina mai Rarotonga aemaise o le feavea‘iga o aao o le susuga ia Apelu Ifopo na siva e faafiafia ai lea aso.
