E lei maua mai lava le taunuuga o suesuega o loo faia i le lotoifale o le pulega o le vaega o le auaunaga faalesoifua maloloina sa pulea e le alii fomai o Dr Stanley Dean o loo faamalolo lē tumau mai ona tofiga.
O lenei ua silia ma le lua vaiaso o faagasolo suesuega a le komisi e pulea tagata faigaluega a le Malo, ae ua masua mai i fafo nisi o fuafuaga sa faataoto e le alii fomai o le siitaga lea o totogi.
O Aperila o le tausaga nei faapea ma Iulai na faatulaga e amata ai siitaga mo totogi o le au faigaluega a le vaega o le auaunaga faalesoifua maloloina e aofia ai fomai ma tausi soifua.
Peitai ua faaalia e se tasi o loo galue i lea vaega o le matagaluega, ua logoina i latou i le faaiuga a le komisi e taofia le faia o ia siitaga e lua.
E lē o iloa le mafuaaga ae ua iai le talitonuga o nisi o le au faigaluega, e lei logoina muamua i latou mo so latou finagalo ae o lea ua liliu le komisi ma taofi le siitaga.
“O se mea lea e matuā faanoanoa ai lava”, na saunoa ai se tasi o tina matua ua leva tausaga o lana auaunaga faalesoifua maloloina. Ua musu e faailoa lona suafa ina ne‘i tuli ai ia ma le galuega.
O le siitaga faaopoopo na fuafua mo Aperila ma Iulai ua mae‘a ona pasia ma talia e le alii fomai o Stanley Dean ua faamalolo lē tumau. Ua leai le pule ae ua pogisa ai nei ma nenefu mafaufau o le au faigaluega poo le ā tonu le sa‘o.
O le tala autū o le Tupe mo le 2010 i le 2011 lea ua mae‘a ona pasia e le Palemene, o loo iai le siitaga o totogi mo fomai ma tausi soifua, peitai e iai vaega o loo silasila i ai le komiti o tupe a le Palemene ona faato‘ā mafai lea ona faatino le siitaga lava o totogi mo tausi soifua poo nurses.
O nisi foi o avanoa faigaluega mo lea auaunaga faalesoifua maloloina ua taofia lē tumau ona o loo faatali le taunuuga o le suesuega o tuuaiga o le faaaogā sese o le pule a le alii fomai o loo faamalolo lē tumau.
E iai nisi o tamaitai ma alii tausi soifua ua mae‘a ona faatino le latou galuega toe faamanatu poo le orientation mo le toe fia auauna faatausi soifua i se tulaga faavaitaimi, o loo nofo tatali foi i se faamatalaga a le alii fomai pule, ae ua motusia ona o le faamalolo lē tumau o Dr Stanley Dean. E lei maua se avanoa e fesiligia ai le Minisita ma le pulega o le matagaluega o le soifua maloloina e tusa ai ma lenei tulaga ua aafia ai le auaunaga faale-soifua maloloina.
