Ua toe tolopoina nei le faamasinoga o le tina Samoa lea na lafoai lana pepe i se autu i Sini Sisifo na semanu e maliu ai lenei alualutoto.
Na talia e le alii faamasino o le Pitonuu o Penrith se talosaga a le loia o loo tulai mo lea tina, i se avanoa e toe tulai ai i le lua vaiaso o i luma mo ona moliaga.
Na ioe ma taliaina e le faamasinoga lea talosaga ma ua atofa nei le aso 12 o Tesema e toe tulai ai e tali i ona moliaga o le taumafai e fasioti lana pepe.
E lē o mafai ona faailoa ma lolomi le suafa o lē ua molia i le taimi nei i lalo o le tulafono, ma o le a lē mafai foi ona auai atu i le falefaamasino i le aso 12 o Tesema, ae peitai o le a saunoa tuusa‘o mai i luga o se fesootaiga satelite mai le nofoaga o loo nofosala ai i le falepuipui mo le taimi nei. Ua faamaonia foi o loo iai se tama tama a lenei tina i Niu Sila.
E tolusefulu tausaga o lenei tina, ma o le aso 18 o Novema na ia tuuina ai lana pepe i lenei alavai poo le autu, ma e lima aso o iai lenei pepe i lalo o le autu faatoa maua e se tamalii palagi ma lona afafine sa vili uila i lea auala ma lagona ai le tagi o le pepe, ma lipotia ai loa leoleo.
O molimau o le aso lua lea na maua ai, ana misi ailoga e soifua umi lenei pepe auā o le aso lea na au ai le vevela o Sini Sisifo i le fasefulu tikeri le maualuga. E ui o le vaivai o lenei pepe i le leai o se vai i lona tino ma manu‘aga i lona tigisami se‘i tulou, ae ua lipotia mai i le falemai le solosolo manuia o lona soifua.
Pau le tulaga ua faamatuu mai e leoleo ma le aiga o lenei tamaitai Samoa, o ia o se tagata e fiafia tele i pepe ma fanau a ona uso ma tuagane, ma o loo galulue nai ona mātua o ni faifeau o le Ekalesia Aso Fitu i Samoa.
O loo sailia foi e leoleo se alii e foliga o se Initia i le nofoaga na maua ai le pepe, i le aso tonu lea na lafoai ai. A o lei tupu lenei faalavelave, sa aumai faatasi ma ona aiga lenei tina i Quakers Hill.
