Ua faagasolo i lenei vaiaso le faamanatuina o le16 o aso ua tetee atu ai i sauaga faasaga i tamaitai.
O se taumafaiga ua faapea ona vaaia ai vaega eseese uma o le atunuu mai i ofisa o le Malo, o le ofisa o leoleo ma faalapotopotoga tuma‘oti atoa ai ma ekalesia lotu ua tutu faatasi uma ina ia talanoaina mataupu ua aafia ai tamaitai ma le tulaga lea e oo loa i sauaga nei manino loa foi le lē tutusa o avanoa ua maua e alii ma tamaitai ona o le tele lava o sauaga o tamaitai o loo afaina ae o le tele o i latou ua faia lea solitulafono o alii.
E lē o aveesea le itu lea o loo iai foi alii ua sauaina peitai e pei ona faaalia i faamaumauga a le atunuu o loo toatele lava tamaitai o loo aafia i sauaga nai i lo alii. O le aso ananafi, 8 Tesema, na oo i ai le faasologa i tusitala, ma ua talanoaina ai auala e lipotia ai sauaga matagā mai i le gagana e faaaogā, o auala e fesiligia ai i latou ua aafia ma le malamalama i le tulafono ma auala e tatau ona faatino ai tusitusiga i mataupu maaleale faapea.
O se auala foi lenei ua fai ai ma se maliega e tusia se lisi o upu poo le gagana Samoa e tatau ona faaaogā auā le faasalalauina o nei ituaiga lipoti ma ia silafia nisi o auala e tatau ona puipuia ai i latou ua aafia i ia solitulafono.
O le mau a le tele o tusitala, o se aoga tāua tele lenei auā o loo agai lava le tagata latou i le auala e iloa e faatau ma taulia ai le nusipepa ma toatele ai tagata o loo faapea ona faalogologo ma o le tele o taimi ua manatu māmā ai tusitala i le ogaoga o nei mataupu ma ua lē manatu ai i lagona o tagata ua aafia.
O le faalapotopotoga a Malo Aufaatasi lea e patino lana galuega i le atinaega o tusitala ma le galuega faa faasalalalu le UNESCO ua tutu faatasi ma le faalapotopotoga a Malo Aufaatasi ua silasila i le unaiga o aiā tatau a tagata faigaluega le ILO lea ua faatautaia lenei aoaoga atoa ai ma le aoga faatusitala i Columbia.
O Lagipoiva Cherelle Jackson ma Laufa Lesa lea na o la faagasoloina le faatinoga o faatalatalanoaga ma le fesoasoani a tusitala matutua i Samoa nei ina ia faamanino atili i le lautele o lenei auaunaga auala e faaleleia ai le faatinoga o lipoti faatatau i sauaga i tamaitai.
O le 46 pasene o tamaitai Samoa na faapea ona faamauina mai i le 17 o tausaga ma le agai i luga ia ua faapea ona fesootai ma se sauaga pe o sauaga o le tino, sauaga o le mafaufau atoa ai ma sauaga o feusuaiga.
O le mau a i latou o loo faatinoina lenei galuega o le faalauiloa o le lalolagi atoa ua faamauina ai, o le tasi i le tolu o tamaitai e sauaina ae i le Pasefika lava ia o le lua i le tolu o tamaitai ua aafia i nei sauaga. O le Pasefika lava ia ua mautinoa le maualuga o sauaga ua faia ma o le galuega faalauiloa e faia e tusitala o le auga lea o lenei aoaoga ma le faamoemoe ia sui le auala e vaavaai ai tagata Samoa i lenei faafitauli, ma ia saili auala e taofi ai le manatu e tatau le fasi i tamaitai auā e lē o se aganuu a Samoa ma e lē o se auala talafeagai foi i le tulafono.
