Ua toe vaaia nei le felanulanuai o moli emoemo, ua faalogoina foi pesega o le Kirisimasi e faailo mai ai le taimi ma le aso ma le mea e tupu ai. Ua moni ai foi ma le mauagagana a le atunuu o le fuata ma lona lou. O le agaga tonu lea o le amataga o lenei masina ua tapenapena ai foi le au Kerisiano e faatalitali le soifua mai o le pepe o le leleiga o lenei tausaga.
E ui lava o se mea ua uma ona tupu ae lē tuua ai lava i le au kerisiano le faamanatu pea i tausaga taitasi auā o le faaolataga lea mo le lalolagi uma.
O le autu lea o le faamoemoe o loo pepese ai pea le Ekalesia EFKS i Magele i Sasae i tausaga uma ma latou faatinoina se polokalame o pesepesega o le 13 aso ina ia faatāua ai i tagata uma lenei meaalofa tāua ma tatou.
O le Aso Sa ua mavae, 7 o Tesema na toe maitauina ai foi le lē ofi o le malumalu o lea ekalesia i Magele ona o le toe amatalia o pesepesega o le 13 aso. O tamā ma tina matutua, o fanau, o nisi o aiga na malaga mai i Samoa ma Ausetalia sa fai sauniga faatasi uma ai i lea po i le tatalaina aloaia o le faamoemoe o lenei tausaga. Ma ua iai foi le suiga i ekalesia ua molimoliina le feau o le Kirisimasi i lenei vaitau.
O le ekalesia EFKS Taeaoafua mai Mangere Bridge na latou tatalaina le polokalame i le Aso Sa, lea o loo i lalo o le taitaiga a le susuga i le faafeagaiga ia Rev Sapati Tima ma le faletua ia Meiolandre Tima.
E silia i le 50 le aufaipese e aofia ai tamā ma tina faapea fanauiti. O le susuga i le faafeagaiga ia Rev Victor Pouesi na faatuulima ma faafeiloaia le mamalu o le auvalaaulia ma tuusa‘o ai loa i le ekalesia EFKS Taeaoafua mo le faagasoloina o le latou polokalame.
O pesega, o tala faatino faatasi ai ma faaevagelia e vaega ia na saunia e le ekalesia e faaleo ai le lagona o le Kirisimasi, aemaise ai o le amataga o le foafoaga a le lalolagi ma faaletonu ai le uluai tagata ae na toe saunia e le Atua le auala e toe maua ai le sootaga vavalalata ma lana fanau.
O le autu lea o le tapenaga a le susuga i le faafeagaiga ia Rev Sapati Tima ma le ekalesia, aemaise ai o le aufaipese toafa a le operanesia lea sa mataina o latou siufofoga i le faalogologo a le auvalaaulia ma le atunuu.
E tasi le itula le umi e faatinoina ai lenei faamoemoe i aso taitasi, ma o lenei polokalame o loo mafai ona toe maimoa i ai le atunuu i luga o nisi o alaata o le tv faatasi ai ma le faalogologo a nisi i luga o le upega tafailagi auā o loo mafai ona tuusa‘o faasalalauga i luga o le tautua a le Radio Samoa 1593 i afiafi uma.
Ua uma foi ona faatulaga ekalesia ma aso o le a faatinoina ai a latou pesepesega, ma e tasi le ekalesia mai Samoa o lea ua valaaulia e molimauina le faamoemoe o lenei tausaga, o le ekalesia EFKS mai Laulii, lea ua fuafua o le Aso Sa o lumanai nei o le a faafiafia ai.
O se tasi tapenaga tāua o loo faatinoina pea e le Ekalesia i Magele i Sasae i tausaga uma, o le saunia lea o taumafataga mo le mamalu o le atunuu ma le aufaipese pea mae‘a a latou pesepesega i aso taitasi. Ua iai nei le faamoemoe o le aso 19 o le masina lenei o le a tapunia ai le 13 aso o lenei tausaga 2014.
