“O le amio masani lava lena a nisi o le tomumu ae faatino lava galuega a le fuimu i taiala ua faataoto”…Komesina o le Tineimu ma Galuega laveai
O suiga o le tau ma mugala, lapataiga ua faamalosia pea i Samoa i mugala ona o le Elnino, ua fetaui lelei ai le foai a Ausetalia o loli fuimu e tolu mo le pulega o le Tineimu ma Galuega Laveai.
E lē o se taimi muamua ua afea ai lea auaunaga tāua i ni fesoasoani mai lea Malo, peitai o ni foai tāua tele mo Samoa auā e utiuti le faasoa a le Malo pe a fua i le taugata o loli fuimu.
O le autu o le saunoaga a le Sui palemia le tofa Fonotoe Nuafesili Pierre Lauofo i le taliaina o le foai, o sootaga vavalalata o Samoa ma Ausetalia o loo masaa mai ai pea le alofa tulai i soo se fesoasoani.
Na faaleo ai foi e le Sui palemia le tāua o le fesoasoani auā o galuega o loo nafa ma le pulega o le tineimu e lē faigofie auā o loo feagai foi ma galuega laveai i ni taimi e tutupu ai ni faalavelave faafuasei poo faalavelave faalenatura.
O fesoasoani a Ausetalia ua aumai ai loli e lua a o le isi loli fuimu o se foai mai le pulega o le tineimu i Melepone i le setete o Vitoria. Ua faatotogaina uma nei taavale i totoga manaomia mo galuega fesoasoani i mu ma faalavelave faafuasei.
O le avanoa na fesiligia ai le Komesina o le pulega o le Tineimu le susuga Faafouina Mupo na tuusao ai se fesili i le tele o loli fuimu ma meafaigaluega ua iai nei, ae o loo iai lava lagona tomumu o le atunuu ona a faatino se latou galuega mo le laveaina o se fale ua mu, e lē mafai ona faasaoina le tele o meatotino poo le liu lefulefu uma.
Fai mai le Komesina o le tomumu masani lava lea ae le mafai ona alo ese le pulega mai le faia o galuega laveai e tusa o taiala ma faiga faavae o loo faatonutonu ai le latou tautua.
E silia i le valusefulu afe le tau o loli fuimu e lua mai le fesoasoani a Ausetalia ae ese ai le loli foai fua mai Melepone. Na ooti e le Minisita o le Tineimu le afioga Sala Fata Pinati le lipine, ma ia faapea mai, “Australia you’re the best”.
O lona uiga “Ausetalia o oe lava o le lelei silisili”. O upu e atagia ai le loto faafetai ma le fiafia, o le minisita auā o ia aseta mo le galuega tineimu e le taugofie mo Samoa, a o lea ua maua fua mai i le agalelei o lea Malo o se paaga totino.
Faaalia e le Komesina o le fuimu e lei mautu se faaiuga a le komiti e pulea le pulega ini vaega o le auaunaga o le a ave iai loli fou. O Ausetalia foi na faatupeina ofisa o le fuimu i Maota ma Asau i Savaii lea ua iai ma taavale fuimu.
