E le ose fusuaga faigofie, ae ina ua mae‘a, oloo Siamupini pea Laauli Joseph Parker. Oloo ia te ia pea le fusi ole Paga Mamafa ale WBO. O Laauli, ole siamupini lava lea a Samoa ma Niu Sila.
Sa iai le faamoemoe ole toatele e puupuu le fusuaga a Parker ma Razvan Cojanu mai Romania. Peitai, na toso le fusuaga ile sefulu ma le lua taamilosaga. E leai foi se taimi na pa‘ū ai Cojanu.
E ui na faigata le tagata lea o Cojanu, ae e lei fesiligia le manumalo o Laauli ina ua mae‘a le fusuaga. Na manino atoatoa lea tulaga ile tele o ai a Parker mai ana tui malolosi na lavea ai e Romanian.
E mai lava ile taamilosaga muamua na vaaia ai le faigata ole sailia e Parker ose avanoa e osofai ai Conjanu
O taamilosaga amata e tolu na manino lava le faaaopoopo o ai a Parker. I taimi na maua ai lona avanoa na ta tui ai ma le malosi le tino o Cojanu. O ia tui na faamoemoe e pau mai ai i lalo lima o Cojanu ma sao atu ai soa ma faalava malolosi a Parker i ona foliga.
Mo Parker, na oo ile taamilosaga lona lima ma le ono, ae vaaia le tau vaivai o lana tui. Aua ua lima taamilosaga o saputu tui ile tino o Cojanu aunoa ma le pau ai i lalo o lima ma le ulu ole Romanian.
Ae ole vaivai ai o Parker ole amata ae foi lea ole malosi o Cojanu. Ole taaimilosaga lona fitu ma le valu na amata ai ona maua e tui malolosi a Cojanu foliga o Parker. Na vaaia le sela o Parker ona ole tele o lana galuega sa fai.
O Cojanu, na faifai ia Parker ile fusuaga atoa. Na pau lea o lana mea na mafai ona fai.
Na ole taufaalili ma taufaifai ia Parker. Ole fono a Cojanu ia Parker, Aua ete sola ese ae fusu e pei ose Toa. Ae na manino faatonuga a Kevin Barry ia Parker ia aua ne‘i pipii tele ia Cojanu aua ole mea lea na manao ai Cojanu ia fusu pipii ma Parker e sao ai sana mea e tasi.
Ole taamilosaga lona 9 ma le 10 na maua ai Parker i isi tui malolosi a Cojanu. E iai le isi tui na matua alu ai i tua le ulu o Parker ona ole malosi. Ae e ui ile tele foi o tusi sao a Parker ile tino ma le ulu o Cojanu, ae e lei fai ane ai i lalo pe pau ifo lana tali.
Na vaaia faapopoleina ole tulimanu a Laauli ina ua pipii tele ia Cojanu ile taamilosaga 11. E tele atu ai tui sao a Cojanu ia Parker ile taamilosaga lea. Ae e foliga na manumalo foi Cojanu ile taamilosaga lea.
E oo atu ile taamilosaga mulimuli, ua leva ona uma metotia a Parker e saili ai se avanoa e sao ai se tuioti, ae oloo tumau pea faatonuga a Kevin Barry ia faamamao Parker ma lima o Cojanu.
Ile minute mulimuli ole taaimilosaga mulimuli na taumafai ai Parker e fusu ma Cojanu ile tulaga na manao ai le Romanian. Ole mea e laki ai e lei sao se tui sese a Cojanu ia Parker, ae e lei maua foi e Parker le auvae o Cojanu.
Ile fesiligia o Parker ile mae‘a ai ole fusuaga pe aisea na umi ai le fusuaga na ia taua ai le masani tele o Cojanu i lana fusu. Soo se mea e togi e ia i a Cojanu ua masani ai ma sauni mai iai.
Ae ole tala a Kevin Barry, na ia amata puipui ai lana tama fusu, fai mai o Cojanu ose tagata faigata tele. ile ta ole logo ma iu ai le fusuaga, pau le fesili na i mafaufau ole toatele pe e fia ai ua manumalo ai Joseph Parker.
E mamao le manumalo a Laauli. Ole faitau a faamasino e toatolu, e – 108-119, 110-117, 110-117. Siamupini pea Laauli Joseph Parker ile Fusi ale WBO.
