E tele naua faamanuiaga ua maua e Pat Lam le faiaoga a le kalapu lakapi a Connacht i Aialani. I taaloga faaiu a kalapu a Europa o le PRO12 i le Aso Toonai na tea nei, na manumalo ai Connacht i le Ipu a Europa.
O se taaloga faigata lea na feagai ai Connacht ma le ‘au a Leinster. O Leinster ua fā nei tausaga o avea ma siamupini a le PRO12. Peitai, na manumalo ai Connacht i ‘ai e 20 i le 10 a Leinster.
O se tulaga pito sili lea ona maualuga ua ausia e le susuga a le alii faiaoga. O Lam sa avea ma kapeteni a le Manu Samoa ma le Auckland Blues. E tasi foi lana taaloga faavaomalo mo le Olopeleki a Niu Sila.
Ua ova ma le fā nei tausaga o faiaoga Lam i Aialani, ma o le taimi muamua lea ua faaeaina ai le ‘au a Connacht i le manumalo, ae sili ai ona mataina le manumalo i le ‘au ua fā tausaga o siamupini i le PRO12.
O lenei taamilosaga e iai faatasi ‘au mai Italia, Sikotilani, Aialani ma Uelese. I le saunoaga a Pat Lam i le faaiuga o le taaloga na ta‘ua ai e Pat Lam lona fiafia tele i le manumalo o lana ‘au.
“O se aso faaeaea lenei mo Connacht, o ni tagata e lē solomuli i se mea ae finau mo le manumalo.” Na ta‘ua foi e Lam o lona naunautaiga ia ofu le tupulaga i le ofu lanu meamata a Connacht aemaise le ofu lanu meamata a le aufili a Aialani. “O le faamoemoe lea o a‘u nei, mo le itumalo a Connacht ma ona tagata,” na saunoa ai Pat Lam.
Na ta‘ua e le alii kapeteni o le ‘au o John Muldoon, o le alii faiaoga ia Lam o ia lea ua suia atoa le tulaga o le ‘au. “E lei ausia lenei manuia i se aso e tasi poo se tausaga e tasi. Ua tolu ai nei tausaga o tapena e Lam le ‘au mo le manumalo i le aso lenei.”
I lana saunoaga, na toe manatua ai e le alii kapeteni aso “pogisa” ma faigata o le kalapu. Ae o lea ua tea le “pologa” ona o le taumafaiga a le alii faiaoga Samoa mai Niu Sila, ua numera tasi ai Connacht ia Europa.
O le isi faamanuiaga ua maua e Pat Lam o le avea lea o ia ma faioaga o le taamilosaga a le PRO12 mo lenei tausaga. Ae lē gata i lea ua matuā fiafia Lam i le filifilia o ana tama taaalo i le aufili a Aialani. E toatolu foi alii taaalo a Connacht na filifilia i le aufili a le PRO12.
O le faamoemoe o le susuga i le alii faiaoga, ia avea le manumalo o lenei tausaga e fausia ai se lumanai lelei mo le nuu aemaise le kalapu. O le maoae o le manumalo a Connacht ona o le tausaga ua mavae na matuai maulalo lava le tulaga sa iai le ‘au, e lei iai se isi e talitonu e ausia e Connacht le Ipu o le Siamupini a le PRO12.
O loo iai alo o le atunuu o loo taaalo ile ‘au a Connacht e pei o le alii Samoa o Bundee Aki i le laina i tua. E toalima isi alii mai Niu Sila i le ‘au lava lea, e iai Tom McCartney na avea ma huka a Aukilani.
Ile vaai mamao mo le lumanai, na ta‘ua e Lam e faigata ona toe tuliloa le Ipu o le 2017, o le a faigata ona o le faamae‘a ai o konekalate a isi tama taaalo a le ‘au, e iai le numera 12, Robbie Henshaw lea ua saini mo le isi kalapu i Egelani. E lē na o Henshaw o le a alu ese, e iai foi isi tama taalo ua saini mo isi kalapu i totonu lava o Peretania.
O ‘au e 12 o le Taamilosaga
Benneton, Cardiff Blues, Connacht, Edinburgh, Glasgow Warriors, Leinster, Munster, Newport Gwent Dragons, Ospreys, Scarlets, Ulster, Zebre.
Aufili a le PRO12
Isa Nacewa (Leinster, captain)
Matt Healy (Connacht)
Bundee Aki (Connacht)
Ben Te‘o (Leinster)
Craig Gilroy (Ulster)
Sam Davies (Ospreys)
Kieran Marmion (Connacht)
Cornell du Preez (Edinburgh)
Josh Van Der Flier (Leinster)
CJ Stander (Munster)
Ultane Dillane (Connacht)
Leone Nakarawa (Glasgow Warriors)
Finlay Bealham (Connacht)
Tom McCartney (Connacht)
Dennis Buckley (Connacht)
