Siamupini aoao Mangere Central School lauga faa-Peretania a Aukilani

Sa faatumulia le Hall a le Ponsonby Primary School i Aukilani i matua, aiga, aemaise aoga eseese sa auai mo le ‘toe aso nai Moamoa’, i le fia molimauina o le laalaa i luma ua oo i ai nisi o tomai o fanau ia latou aoaoga.
O le Aso Lulu talu ai, 23 Setema, na faataunuu ai le tauvaga o lauga faa-Peretania a Aoga Maualalo ma Aoga Faaleonolua (Intermediate) i le Tausaga Valu i Aukilani aoao.
E na o le sefulu aoga sa mafai ona ausia le faaiuga o lenei tauvaga.
E toafa alii papalagi, toafa tamaitai papalagi, toatasi le tamaitai Initia, ma le alii Samoa e toatasi sa filo ai, le alii o Okesene Junior Seiuli Okesene.
Sa matagofie uma sauniuniga a alo ma fanau, na tofu le tagata ma lana matua sa taulai atu i ai lana lauga. Peitai e le mafai lava ona mua uma ni vaa e pei o lea upu a le atunuu.
O le iuga o lea tausinioga, na auau faatasi ai faamasino (alii ma tamaitai papalagi) e tuuina atu le siamupini aoao o le Tauvaga Lauga a le Tausaga Valu mo le Tausaga 2009, i le alii Samoa o Okesene Junior Seiuli Okesene mai le aoga a Mangere Central School.
O le ulutala o lana lauga e faapea, “My Goals”.
Sa matua faafiafiaina matua ma aiga sa auai, aemaise le aoga a Mangere Central ona o se tulaga siitia ua latou ausiaina i lenei foi tausaga.