(Pulega EFKS Saute Kuiniselani)
O le anavatau o le auaunaga a le Samoa, e faasiusiumata lana vaai poo faape‘ī le galuega a le Atua e ala i totoga o maota o faafeagaiga.
O le galuega faatina a lava tapena le lotoifale o le galuega o le puaina foi lena o le manogi o le faatuatua.
A o foe mua ma le foe muli o le tautai o le vasa i tuā laoa ma tuā maota o le aufaigaluega, o loo tu tootoo ai le Tiakono toeaina.
O le taualuga foi lea o faiga mea a Pulega e tolu o le Matagaluega a Kuiniselani i le faamati o le 2012, ua taualuga nei e le pulega a Saute e faitau silia ona aulotu.
E tele suiga fou i totonu o maota ua faatotoga ma faamatagofie ai maota o le galuega a le Atua ma ua lasi ua lē masino i le silasila ma le vaai.
O nisi o ekalesia ua toe faafou uma totonu ma fafo o maota o le galuega, e pei o le ekalesia o tausia e Rev Ionatana Faaiuaso. Saunoa le faletua o le tiakono toeaina, e faafetai mo galuega mae‘ae‘a a tina uma o le pulega.
O le mau sa siitia e le faletua o le galuega ia Senerita Mataafa a o se tuualalo foi lea a le faletua manumalo malolo ia Tima Tu‘iai, “Ua papa o matou tumuai i la outou faaaloalo”.
(Faataoto 11: 24) O iai lē na te faasalalauina ana mea, ae atili ai ona maumea, o iai foi lē ua taofi ana mea, e sili i le mea ua tatau ai, ae mativa ai o ia.
O le Atua o sosia ia sasaa ana faamanuiaga i aiga taitasi ma tina ona o lo outou silasila i le Atua ma le galuega.
Na faaiuina i le saasaaga matagofie a faletua o le aufaigaluega e faafetaia ai le Atua ma alo foi i faafiafiaga masani. O le kapeteni sa faatautaia le aso o le faletua ia Alapeta Faaiuaso.
Sa alo foi i faaaloaloga a le pulega sa faafoeina e le tiakono ia Saletolo Peniamina e momoli ai le agaga faafetai i le Tiakono Toeaina ma ona soatau Tiakono sa galulue.
O le taumafataga sa tapenaina e le tamā matua o taumafa, Uncle Sam’s Catering (Poulava Sam ma Lorna Matautia) ma tapunia ai foi le faamati o le 2012 i le tatalo na saunia e le Toeaina Rev Tauaaga Mataafa.
