E to‘a sefulufā fanau e ta‘i 4 tausaga sa faauu mai i le aoga amata o le Fetu Taiala Aoga Amata i Magele, ma ua faamavae atu ai nei foi faiaoga ma le aoga i nei fanauiti ae sauni atu e ulufale i aoga tulagalua ina ua faaiuina ma le manuia latou taumafai totonu o le Aoga Amata.
O lenei faamoemoe sa faataunuuina i le hall a le Shilon Komuniti i Magele i le taeao o le Aso Faraile 10 o Tesema. Na amata le polokalame i le sauniga lotu na taitai e le susuga i le faafeagaiga ia Rev Sapati Tima mai le Ekalesia EFKS Taeao Afua e siitia ai le taulaga o le viiga ma le faamanū i le Atua ina ua faaiu ma le manuia taumafaiga a le fanau.
Sa laulaututu mātua ma aiga faapea uo ma ē masani sa molimauina lenei faamoemoe a o alu atu le solo a le fanau faauu i o latou nofoaga. O se sauniga ma loimata o mātua ina ua latou talia ma le fiafia le tali mai o fanau i lo latou tautiga sa tigaina ma gapatia ai i le tausaga, ae o se loto faanoanoa i faiaoga auā ua motusia ai le mafutaga ma nisi o le fanau sa latou mafuta i totonu o le Fetu Taiala.
Na sosoo ma le saunoaga a le tina ia Iolesina Tagoilelagi ma faagasolo ai loa le tufatufaina o tusipasi mo le aufaaiu aso ma faailoga faapitoa lea sa tauaaoina e le susuga ia Fuaina Taulia.
Na toe fafagu mai i lenei faamoemoe laugatogi i Samoa i le feei ma le tauvalaau o mātua i le loto fiafia pe a lau mai le tulaga o lona alo ua faamanuiaina. Ae o le matagofie ma le maualuga o lea aso ina ua faatasi atu i ai le faatina o le SAASIA Aoga Amata Samoa i Aotearoa le faletua ia Lolesina Tagoilelagi, faapea le taitaifono o le SAASIA le susuga ia Sala Faasaulala Tagoilelagi Leota faatasi ai ma le sui o le Local Board a Magele le susuga ia Tafunai Tasi Lauese.
Na sosoo ma faafiafiaga e ala i pesepesega ma tala faatino o le Kirisimasi lea sa faapupula ai e fanau le feau ma le tāua o le soifua mai o le pepe o le Kirisimasi i le auvalaaulia sa auai, ae lē gata i lea sa latou faamanatu ai foi le tāua o le tausami i le eleni e leai se ma‘i e maua ai.
Na atili ai le fiafia o mātua i le taumafaiga a le fanau i le lelei o le tautala i le gagana Samoa sa faaaogāina, ma o se fu‘a o loo agiagia pea i totonu o lenei aoga i le galuega fita a faiaoga o loo faatinoina i le taumafai pea e faasa‘osa‘o ma faatonutonu fanau i totonu o aoga amata. Auā a lelei le fofoaina o le olaga o le tamaitiiti mai lona laitiiti, o le a faigofie foi galuega a isi faiaoga o loo galulue i aoga tulagalua ma Kolisi.
O le loto fiafia o mātua na tutupu ai lagona o le titifaitama ma le loto foai e ala i saasaaga ma siva Samoa sa tauala i fanau sa faauu. Na sosoo ma le tufatufaina o fua o le laau kirisimasi e susuga i faiaoga ia Fuaina, Gina ma Sarah auā ni meaalofa mo le fanau, ma faaiu ai i le saunoaga a le taitaifono o le aoga le faletua ia Vaitavae Moe, lea sa momoli ai lona agaga faafetai i mātua i le lagolagoina o polokalame a le Fetu Taiala Aoga Amata i lenei tausaga, aemaise o le mamalu o le auvalaaulia sa molimauina le faauuga a le fanau.
O le susuga ia Apulu Iuni Ieremia sa fai ma fofoga o le aso i le taimi o le sauniga, a o le faletua ia Leata Tuiloma sa faatautaia polokalame o le taumafataga.
O le Fetu Taiala Aoga Amata e toafitu faiaoga o loo nafa ma le aoaoina o le fanau faatasi ai ma le puleaoga le faletua ia Letelemalanuola Moe Penn.
