Ua iai se isi auala o le a mautinoa le fiafia o le tele o aiga i Samoa e foi i le fai o fagaga moa.
O le alii faipisinisi lea ua agai i faatoaga ana pisnisi, o Seve Sung Chan Chui, o loo ua amata i le vaiaso lenei sana uta atoa o talo e agai atu i Niu Sila ae o le masina o Aukuso lea ua manatu e tatala aloaia ai loa i le maketi o fefaatauaiga i Samoa nei ana moa Samoa.
“O le a taugofie mamao nai i lo moa atoa ia e aumai mai i fafo, ma o le a sui ai vaemoa ua tele ina agai i ai le atunuu e faatau,” o sana faamatalaga lea ina ua tapa sona finagalo i le atina‘e fou lenei.
O talo e pei ona iai se to‘aga tele a le alii fai faatoaga i Lotofaga o lea ua faatino nei le faamoemoe lava sa iai ina ia toe faaopoopo atu ana foi fua o faaeleeleaga i isi talo ua amata nei ona toe faatau atu i Samoa.
O le lafumoa a le faifaatoaga lenei na amata mai ia Ianuari, e 32 moa na amata ai. O le taimi lenei ua sili laitiiti atu i le 150 le aofai o le lafu moa.
Ta‘ua e lenei alii e fetaui lava le oo atu ia Aukuso ua oo atu i le 2000 le aofai o moa e amata ai lenei atina‘e.
“Ou te lē manao e tatala le atina‘e ae lē umi ae uma ma ou te talitonu lava e vave ona taulia auā o le a taugofie ma o moa e mautinoa lava e lē o iai ni vailaau o aafia ai le fagaga ma e lē tuua foi i se falemoa auā o la‘u toaga lea e faatataa ai lava moa Samoa.”
Ona pau le galuega tele ua fai nei o le tuu o moa i nofoaga e maua ai fuamoa ma faafofoa ai ma ona pau le galuega tele na ia ta‘ua o loo faia nei e lana aufaigaluega, o le siaki i le tele o le taimi o ni isumu, ve‘a ma nisi manu e osofaia tamai moa ae o meaola foi e faatamaia fuamoa o loo tau faafofoa.
Faaalia e lenei tamalii e lē tau faalauiloa le tulaga lelei atoatoa atu o le Moa Samoa nai lo le tele o isi aano o manufasi o loo aumai mai fafo. O le fuamoa foi o le moa Samoa ua tele lipoti ua ta‘ua ai le maloloina lelei.
O lea la ua sauni lea tamalii mo le taumafaiga tele lenei. “E fia amata le faamoemoe i moa lava o loo maua i la‘u faatoaga ae o le faamoemoe ina ia tatala atu foi le avanoa mo isi fai lafumoa Samoa e faatau mai ai a latou fagaga i le kamupani lea ua sauni atu ai nei e amata,” o se saunoaga lea a Chan Chui.
Na ia ta‘ua foi o le tausiga o le lafumoa e aofia ai taumafa mo moa o loo faatau mai i le Farm Tech ma o le afiafi e fafaga ai i le penu.
“Ou te iloa lava e tele le tupe faasili e maua mai auā o le tau o le tausiga o le fagaga e lē tele tele se tupe e faaalu ai. O loo maua fua mai foi le popo o loo maua ai le penu mo le tausiga o moa.”
“E lē o iai foi se faamoemoe e tuu i se falemoa le lafu lenei auā e tuu loa i totonu o pa ona mautinoa loa lea o le paeee o moa ma lē taulia ai loa”.
O Chan Chui sa taumafai e tamoe i le faigapalota a Samoa i le 2006 ma na ia ta‘ua atonu e lei tatau lava ona avea ma faipule ae o le toe foi i faatoaga ma le faatinoga o fagaga nei ua ia mautinoa o le a tele atu le suiga o lona foi soifua tautua o le a vaaia ai.
