E toaiva i latou mai isi atunuu, ua faamaonia nei le avea ma tagatānuu Samoa poo sitiseni Samoa. O se sauniga puupuu na faia i le potu fono o le Kapeneta a Samoa i le Eleele Fou, lea na faatautaia ai le faatautoga o i latou uma nei e toaiva, E eseese uma atunuu e o mai ai i latou. O nisi e mai lava i totonu o atunuu o le itulagi a le Pasefika, e pei o Fiti, Niu Sila ma Ausetalia.
E iai foi i latou e malaga mai atunuu e pei o Peretania, Amerika, Initia ma Saina. Ma na molimauina le faafiafiaina o i latou uma ina ua mafai ona faamaonia lenei laasaga tāua i o latou soifuaga, ua avea ma tagatānuu moni o Samoa.
O le taimi na faatino ai le faatautoga o i latou nei, sa tatau ai ona latou faia ni tautoga i luma o le Kapeneta a Samoa e faapea, o le a latou tausia uma tulafono a le atunuu, o le a faaaloalo i le aganuu ma agaifanua uma a Samoa, ma o le a latou faatinoina foi ni gaioiga e atili faaauiluma ai le igoa tauleleia o Samoa i le va ma isi atunuu, i le avea ai ma ona tagatānuu.O le afioga i le alii Palemia, Tuilaepa Sailele Malielegaoi na saunoa e faamanuia ma faamaonia lenei laasaga tāua tele i nei tagatānuu fou e toaiva.
O le tāua o nei faamaoniga tau tagatānuu mo i latou e toaiva, auā o lona uiga o lenei foi la ua ia i latou nisi o aiā tatau faatagatānuu Samoa, e pei o le mafai ona palota i taimi o faigapalota a le atunuu, ua mafai foi ona latou agavaa mo se penisione pe a aulia na tausaga faatulagaina a le Malo, le aiā e maua ai nisi o faamatalaga tau femalagaiga, o le a faigofie foi ona latou saili solo mo soo se avanoa faigaluega i totonu o Samoa e mananao ai, ua mafai foi ona latou talosagaina ni avanoa faasikolasipi a le malo mo le faaauauina o ni a‘oa‘oga, aemaise ai, ua agavaa mo le tauaveina o le igoa o Samoa e fai ma sui i ni taaloga e masii atu i isi atunuu.
O le toatele lava o i latou nei, o nisi ua leva ona mautu o latou tulaga i le itu tau pisinisi i totonu o Samoa, e pei o le alii o Mr Jiadong Li ua toetoe 12 tausaga talu ona faigaluega i Samoa.
O le tamaitai o Mrs Zahna Wetzell ua leva foi ona galue mo le kamupani a le Apia Concrete Products. O le alii o Mr Nacanieli Tuivavalagi ua tele tausaga o galue i le matata faafaiaoga i Samoa, e pei ona galue ai i le Iunivesite a le Pasefika i Saute i Alafua.
O le tamaitai o Mrs Maria Leota, o lana auaunaga foi lea o loo galue ai, o le faiaoga mo fanau loaiti, e pei ona sa avea ai muamua ma pule o le aoga tulagalua a le Peace Chapel Primary School, a o Mr Vinod Jacob, o se tasi e telē lona tomai i matamata tau Information Technology, o se tasi o atina‘e ua fai lava si televave o lona tuputupu a‘e i totonu o Samoa.
E 4 vaega e mafai ona talosaga ai se tasi mo se sitiseni Samoa – ua fanau ni fanau i Samoa, na tupuga mai ni mātua Samoa, ua mae‘a ona nofomau i Samoa, ua faaipoipo atu i se tagatānuu Samoa.
O tagatānuu fou (9) mo Samoa:
Mr Daniel Owen Henson (NZ), Karen Mapusua (Ausetalia), Zahna Wetzell (Peretania), Lynn Rasmussen (U.S.A.), Maria Simone Leota (Ausetalia), Jiadong Li (Saina), Nacanieli Tuivavalagi (Fiti), Vinod Jacob Kurian (Initia), Ian Charles (U.S.A.)
