O le aso 24 o Me 2013, ou te tu ai i le Federal Court a Ausetalia ma se loia Aussetalia e finauina le fesili lea e ta‘ua i luga. E lē na o le fesili lea e ta‘ua i luga e finauina, e iai ma isi vaega o ni faaiuga a se faamasino o le fale Faamasino Maulalo, o loo tetee ai tagata Samoa i Brisbane Ausetalia, i totonu o le Ekalesia o le Lotu o le “Jesus Christ Latter Day Saints” (Lotu Mamona).
Ou te lē talanoaina faalauaitele lenei matupu auā o lea e lei faia le Apili i le fale faamasino. Ae a iai se isi e iai ni ona manatu faaali, ona faafesootai mai lea o a‘u pe tusi foi i le tatou pepa e faaali lou manatu i lenei mataupu tāua. O lau aiā tatau i luga o le tulafono o le faaali lea o lou manatu i se mataupu e tāua ia te oe. “You have a legal right to voice your opinion”
O se Faamatalaga Puupuu i le Mataupu lea o le a ou Finauina ma se Loia Ausetalia, mo ni Aulotu Samoa i Kuiniselani:
E iai Ualota o le Ekalesia o le Lotu Mamona e tele o tatou tagata Samoa e lolotu ai. Sa faataga ona fai sauniga i le gagana Samoa. Peitai o le 2007 i le 2008, sa faasā ai ona toe faaaogāina i le gagana Samoa i totonu o lotu Mamona i Ualota ia.
Na tetee tagata Samoa i le faasāina ona faaaogā le gagana Samoa ia latou sauniga. Ua faasā ona pepese ni pese lotu faasamoa, faasā ona tatalo faasamoa i luma o le faalapotopotoga, faasā ona fai ni lauga poo ni molimau faasamoa, i luma o le faalapotopotoga.
O Samoa e i totonu o nei Ualota, na ave le latou tagi, e faapea o le aveeseina o le latou gagana Samoa e solitulafono lea laasaga i le Tulafono e faasā ai le faailogalanu – Racial Discrimination Act 1975.
E 2 tausaga ma masina e 8 o faatali le tali a le faamasinoga a nei tagata Samoa, ae aumai le tali fai mai, e lē taliaina e le fale faamasino le tagi a tagata Samoa. Fai mai le faamasino na te lagolagoina le iai o le aiā tatau a le Lotu Mamona e faasā ai le faasamoa pe a lē fetaui ma polokalame a le Lotu Mamona le fa’aogaina o le fa’asamoa.
Sa tele lava ina taliaina e le faamsino Ausetalia le finauga a loia a le lotu Mamona, ae lē taliaina finauga a le loia na tu mo tagata Samoa. O le ala lea ua toe Apili ai e o tatou tagata Samoa o i Kuiniselani le faaiuga muamua, i le fale faamasino e maualuga atu, o le Federal Court. O le Federal Court a Ausetalia e iloiloina ni tagi faaletulafono e aafia ai Ausetalia atoa, ae lē gata i ni mataupu i Kuiniselani.
Ona o le mataupu lenei e aafia ai Ausetalia atoa, i se tagi i lalo o le tulafono o le Racial Discrimination Act 1975, ma e aafia ai tulafono a le lalolagi (International Conventions) e saini ai Ausetalia ma faaaogā e Ausetalia, o lea ua talia ai le Apili i le Federal Court, a tagata lotu Samoa ia e tetee i le faasāina o le faaaogāina o le gagana Samoa i totonu o lotu a aulotu o le Lotu Mamona, ia e lolotu ai.
O le tagi a tagata Samoa e lautele ma lavelave, ae peitai e finau lava tagata Samoa ia e Apili, e tāua ia i latou le faaaogā o le gagana Samoa ia latou tatalo, viiga, molimau ma lauga auā o le gagana ma upu lea latou te faaaogāina o upu e aumai i totonu o latou agaga ma latou fatu e faavae i o latou talitonuga i le Atua.
E tetee tagata Samoa i le finauga a le loia a le lotu Mamona lea na fai mai, e lē o aveeseina le gagana Samoa, ona o lea e faaaogā faaliluupu ma masini e faasamoa ai folafolaga ma sauniga faapapalagi.
O loo tetee foi tagata Samoa i le finauga a le loia a le lotu Mamona e faapea, e lē o toe tāua le faaaogāina o le gagana Samoa, auā o le tele o tamafanau a Samoa e lē iloa faasamoa.
Sa molimau nisi alo o Samoa e faapea, e moni o latou na fananau i Asetalia ma Niu Sila, ae tāua ia i latou le iloa tautatala i le gagana a latou mātua le gagana Samoa. E tiga ona iai nei molimau a alo o Samoa, ae sa lē faaaogāina e le faamasino muamua nei molimau, i lana faaiuga na malo ai le lotu Mamona.
O le fesili tāua mo i tatou Samoa uma, pe tāua ia te oe le faaaogāina o le gagana Samoa e te tatalo ai, ma pese ma fai ai sau molimau i totonu o lau Ekalesia? O finauga faaletulafono lea e fai i le aso 24 Me, e iai uiga tonu o upu o le Racial Discrimination Act 1975 – ma le finau a tagata Samoa lea e faapea “o le matou aiā tatau i le tulafono e tatau ai ona matou fai sauniga i le gagana Samoa auā o le matou aiā tatau lena o matou o tagata ola, ma o le matou salotoga tāua foi lea (fundamental freedom).
E tāua ia te oe lau gagana Samoa? E tāua ia te oe lou tapuai i le Atua i lau gagana Samoa? Afai e te ioe i le fesili lea, aisea? Afai e te tali i le leai, aisea?
