Kalapu fai mea mafai a le Mauga o Alii

Ua molimauina o se tasi lenei o taaloga e uigaese foi lona tulai mai i le faafiafiaina ai o auauna paia a le Atua ma nisi o tamalii ma failauga aemaise o soo se tasi. E lē gata o se faamalositino, ae o se faagatama faitaulia ua oo lava ina fesagai ai le tele o alo ma tamafanau a Samoa i Ausetalia.
O le kalapu a le Mauga o Alii o loo lealea pea le ti‘a o le manumalo auā na siamupini i le taaloga fava-o-setete e aofia ai Melepone, Sini ma Perisipeni, lea o loo mau ai pea le talita. O le taaloga tele lea sa faia mai iinei i le vaitaimi o le Eseta o le tausaga nei lava.
O le taeao o le Aso Lua, aso 4 o Iuni, na faagasolo ai le isi taaloga i le va o Divisons e tolu sa vaevaeina i le A, B ma le C.
O le A na manumalo ai le tofa ia Poulava Sam Matautia (Uncle Sam’s Take Away); (2) Galumalemana mai Fagalii; (3) Vaaulu Pesamino.
O le B na manumalo ai le afioga ia Lemalu David Perelini; (2) Faasalaia‘i Vae Faasalaia‘i; (3) Lausei Manaia.
O le C na tulaga muamua ai le susuga i le faafeagaia ia Rev Milo Faaleava; (2) Tui Pātau; (3) Pita mai Oxley. O le siamupini aoao o le taamilosaga o Avai‘a Java Young.
Na faia foi le taamilosaga a faafeagaiga lava ia. Manumalo Rev Milo Faaleava; (2) Rev Ionatana Faaiuaso; (3) Rev Aofaiga Levi o faafegaiga uma o le Matagaluega EFKS.
O lea aso na alo ai le kalapu o le Mauga o Alii e faatofusia malo faaaloalogia ma le autaaalo i le tele o meaalofa  taumafa ma seleni, faapea ipu o le tauvaga mo ē sa lautogia, sa tauaao aloaia i le Aso Gafua na aofia i laugatogi o le faamanatuina o le tutoatasi o Samoa i Kuiniselani a o silamiō ma molimauina e i latou na tauaofai i lea aso taupoina.
O le komiti o le Mauga o Alii e aofia ai le Peresetene o Faasalaia‘i Vae Faasalaia‘i; Failautusi o Seiuli Aleni; Teutupe o Avaia Java Young; ma le kapeteni o Taua Vaeai.