Piki Lui Saena i le U12 a Rebels Melepone

E manatua e Samoa Matamua Filipo Saena i lona taimi i le au malosi a Moataa faapea le Manu Samoa.
O lenei vaitau ua aumau nei i Melepone Ausetalia ma lona faletua ia Katerina lea ua iloga ai nei le suafa o le la alo ia Lui Bartley Saena mai le kalapu lakapi Iuni a Endeavour Hills i lalo o le sefululua tausaga.
Ua filifilia nei Lui Bartley Saena i le Rebels U12 i le tuanai o le mataina o lana taalo i le tausaga nei. O le tulaga o lona tamā ia Matamua Pauli Filipo Saena o le numera sefulu o loo taalo ai foi Lui ma e uigaese lona agavaa i soo se vaega o le taaloga.
O Lui na faasuafaina ia Tauloa Lui Auvae le tuaa o Lolo Lui mai Moataa ma o se poutu o le kalapu na suipi i tele o tausaga i le taitoafitu a Samoa ma le malisi.
Mai taaloga e sefululima o lenei tausaga e luasefulutasi(21) sikoa a Lui, fasefuluiva (49) sikoa na ova (conversions) ma le tuuaofaiga o ‘ai na ia maua i le tausaga atoa e luaselau ma le tolu (203).
O le filifilia ai o Lui i le aufili i lalo o le sefululua tausaga a Rebels o le a taalo ai i le tauvaga lakapi faaitumalo e faia a setete i totonu o le laumua i Canberra i le aso 4-6 o Oketopa.
O le mafuaaga lea o se sailiga seleni na faafoeina e nai ona mātua e auala atu i se ‘Hamper’ na faia ai se lulu mo tapenaga auā le tapuaiga o lenei faamoemoe ia Oketopa. Na manuia ma momoli foi se faafetai a le tamā ia Matamua Pauli Filipo Saena ma le aiga ia i latou na lagolagoina le faamoemoe o lenei alo talavou o Samoa a ua faatusalia i fetu pupula o le lakapi.
I se maimoa a le atunuu i se ata tifaga tuufaatasia o sikoa uma a Lui na atagia ai le matautia o le pue ma le momo‘e a lenei atalii i le numera sefulu. I le tulaga o le puipuiga ma le pue, na toe manatua uma e i latou na maimoaina lenei ata tifaga le malosi na iai le tau‘au o Matamua a o tautua i le Manu Samoa, lea na ‘afu ai isi tama taaalo o le lalolagi.
O le tulai mai foi o le atalii ua silasila i ai Samoa i le ituaiga taleni o le a manuia ai foi le Manu Samoa i le lumanai.