Tuli ese faiaoga ma le nuu, faatoese ma fai le ifoga, taualuga i le falepuipui

O se alii faiaoga ua 26 tausaga lona matua o ia lea o Isilei Tuiletufuga o Vaiee Safata ua nofosala i le falepuipui mo le fā tausaga ina ua ioe i moliaga e fā, e aofia ai le faia o le solitulafono o le pule lē uma, faaoolima matagā, ma le taumafai e faia se faaoolima matagā.
E toafā teine aoga mai le 15 i le 16 tausaga le matutua na ia faia i ai le solitulafono. Faato‘ā lua tausaga talu ona faauu o ia i le tomai faafaiaoga ina ua mae‘a ana aoaoga ma ua fai lona toalua o se faiaoga foi, ma e toalua lana fanau o le ulumatua e tolu tausaga.
O le va o le masina o Mati ma Me o le tausaga nei 2013, na tulai mai ai le solitulafono. O le teineitiiti na aafia i le solitulafono o le Pule lē uma na faaalia sa loto i ai, ma sa faaalia foi sona lagona alofa i le alii faiaoga.
Peitai o le faaiuga a le alii faamasino o Justice Pierre Slicer o loo faaalia ai le manino o le tulafono i le puipuiamalu o fanau teine laiti mai ni amioga solitulafono e aafia ai lo latou matutua e i lalo ifo o le 16 tausaga.
O le aafia o lea faiaoga i solitulafono tau feusuaiga faasaga i ni tamaitai aoga laiti o se isi lea tala lē lelei ua aafia ai le galuega faafaiaoga aemaise o le faafitauli o le toagaogao o faiaoga e galulue i aoga a le Malo.
O se faatalatalanoaga ma le Pule sili o le Matagaluega o aoga taaloga ma aganuu i le masina na tea nei, na fesiligia ai sona lagona i le aafia o faiaoga i ni solitulafono ma motusia ai le latou auaunaga ma atili faatuputeleina ai pea le toagaogao o le aufaigaluega.
Na faaalia e le Pule sili, le afioga Matafeo Falanaipupu Tanielu Aiafi, e moni lava i le faaitiitia o faiaoga ona o nisi ua malaga i fafo, litaea pe suia foi galuega ua galulue ai ma nisi ua motusia le auaunaga ona o faafitauli e aafia ai i le galuega, peitai e lē mafai ona teena le mea moni, o lē lava e solia le tulafono e tatau ona faia i ai le faaiuga fetaui ma talafeagai.
O tolaulauga a le faamasinoga na faaalia ai o Isilei sa tetee i moliaga, ae ina ua sauni leoleo e tuuina atu molimau ma valaau le mataupu mo le suesueina o moliaga, na suia ai ma le tali a lē ua molia ma ia ioeina ai moliaga uma e fā.
O se itu lelei mo ia lipoti lelei mai lana ekalesia ona o se tagata galue lelei mo le lotu. Sa faia foi se iuga a lona nuu e faatulai ese, ma faia sana sala e lima afe tala ma isi vaega e pei o palapala a malo, ma sa faia foi e lē ua molia ma lona aiga se ifoga i se tasi o tamaitai na aafia.
Ona o aiaiga sa tatala ai o ia i tua e faatali se aso e lauina ai se faaiuga o ona moliaga, sa faapea ona noatia ai le avanoa e faia ni faatoesega i aiga o isi tamaitai e toatolu.
Sa faatoese foi i le Pule aoga o le aoga sa galue ai, faapea se faatoesega i le matagaluega o aoga a le Malo.
Ua taofia e le faamasinoga le faasalalauina o suafa o tamaitai na aafia poo se isi lava faamatalaga e iloa gofie ai i latou e pei o o latou nuu o loo nonofo ai.