“Faauta ou te aumaia ia te outou le tala lelei e olioli ai nuu uma”. O le manulauti lena o lenei faatasiga matagofie na matuā faatumulia ai le maota o le EFKS i Cannons Creek lea e galulue ai le susuga i le Toeaina ia Aufaga Faafia ma le faletua ia Sina i le Aso Sapati na tea nei. O se afiafi lagilelei le tau a o taufai gasolo mai le anoano o ekalesia mo lenei faatasiga matagofie.
O le afioga i le Taitaifono o le Mafutaga a Faifeau le susuga ia Rev Perema Leasi na tatala aloaia le Mafutaga Tuufaatasi o ekalesia e 14 o le itumalo o Porirua i le faafeiloai mai i le aofia o ekalesia ma faifeau ma faasolo ai talosaga: Faafetai o Rev. Nove Vailaau; Faatoesega o Rev. Farani Vaa (Misionare Ekalesia Metotisi); Manaoga o le Fesoasoani ia Tagi Vaoliko. Na saunoa loa le Failautusi o le Mafutaga ia Rev. Patrick Fenika e faaauau le gasologa o le polokalame.
Na matuā saunia lelei faaevagelia mai ekalesia eseese faapea pesepesega e viia ai le Pepe o le Kerisimasi. O nai alo ma fanau laiti na matuā vaaia le fiafia e pepese ma fai taga uma, e oo lava i le aumatutua. E leai se ekalesia na faavaivai ni ona tagata i le faatinoga o nei viiga ma sauniga faaevagelia ua viia ai le Pepe o le Faaola o le lalolagi.
O le upu folafola puupuu ma le ‘anoa na saunoaina e le Taitaifono ia Rev. Perema Leasi. Sa ia faafetaia foi le auai mai o susuga i faafeagaiga ia Hana ma Tavita Filemoni faapea ma se tasi o faifeau mai Samoa sa fai ma malo faaaloalogia o lea po.
Na faasolo atu ai i le taliga o le sua na saunia e le EFKS i Cannons Creek ma fetalai ai loa le Tofa ia Levaogogo Tiata e faafetaia le ekalesia ma le susuga i le Toeaina ia Aufaga Faafia ma momoli le meaalofa na saunia e le Mafutaga Soofaatasi a ekalesia mo le ekalesia i Cannons Creek.
Sa faapea foi ona momoli ai ma faamanuiaga o le Kerisimasi ma le Tausaga Fou. O le fetalaiga ia Siliala‘ei na fetalai e fai ma fofoga o le susuga i le Toeaina ia Aufaga ma le EFKS i Cannons Creek ma ta‘ape ai le aofia ma le agaga faafetai i taumafa faaleagaga atoa ai ma le faaletino.
