O le mafutaga a tamā ma tina matutua ua silia i le ta‘i 60 tausaga agai luga, ua ta‘ua e nisi o se aiga e tasi mo i latou, auā e faasoa ai o latou manatu ma lagona faamatua matutua, ma fai ai a latou taaloga ma le faamalositino.
O le taeao la o le Aso Toonai ua mavae 8 o Novema, na faamanatuina ai le atoaga o le 10 tausaga talu ona amata mai lenei faalapotopotoga. O se aso lagilelei ma susulu manaia le la ua foai e le Atua e faataunuuina ai le faamoemoe sa nofo tatalo i ai nei tuaa matutua auā le latou aso fanau.
E silia i le 50 tamā ma tina matutua sa auai faapea afioga i Patele, ma le afioga i le faipule ia Su‘a William Sio sa latou sii faatasi le viiga ma le faafetai i le Atua ona o nei tausaga e tele ua foai i le latou mafutaga. O nisi o tina ua ta‘i 95, 80 tausaga ae sa vaaia le maua o le tino malosi ma le faamalologa i o latou tino.
E ese foi le mālie i le faalogo o suaga a loomatutua ma toeaiina, ma ua taunuu ai le upu, ‘E faapuna lava le pusi ma si ana felau.’ O se mafutaga e tumu i le fiafia, e feiloai ma feasogi tagata uma ma toe faamanatu tala mālie. Ua maitauina ai foi e le tusitala o le tasi lea nofoaga aogā mo matua matutua o faalapotopotoga faapenei, e maua ai le fiafia ma le ‘ata auā o le vailaau sili lea mo i latou.
O le tamā matua ia Tuaopepe Faumuina Aperila Faumuina sa taitaia le sauniga i le tatalo faatasi ai ma lana faamalosi i le afioga Paia a le Atua. Na saunoa le taitai, “Afai e lē atinae e Ieova le fale e galulue fua i latou.” O se luitau na toe fafagu ai i le mafutaga le faamaoni o le Atua, ma le lē tuulafoaina o i latou matutua i aao mafanafana o le Alii.
O le afioga ia Samoa Togia Felise sa faafeiloaia le mafutaga, ma o ia foi o le Peresetene o lenei faalapotopotoga, ae o le faletua ia Miriama Samoa, o le failautusi lea, sa laulauina le lipoti o le Malia Imakulata talu ona faavae mai.
O se tasi o itu tāua o lea aso, o le faamalositino, sa vaaia le lē faavaivai o toeaiina ma loomatutua i le faiga o le zumba, ma faaauauina ai nisi o a latou polokalame ma sosoo ai ma le taumafataga, ma taaloga poka ma talatalanoa.
O Malia Imakulata na amata mai ia Oketopa i le tausaga 2002, ma ua 13 nei tausaga talu ona faavae mai i lalo o le taitaiina a le susuga ia Leapai Hunkin ona sosoo ai lea ma Tuaopepe Faumuina, faasolo ane ai ia Tuifaasisina Vaa ma see mai ai ia Samoa Togia Felise seia oo mai i le taimi nei, ma sa ta‘ua e le failautusi ia Miriama Samoa o lenei faamoemoe ua leva ona fuafua, ae sa vaavaai lava i se seleni e maua e faatinoina ai.
Auā e leai se mea e maua ai se vaega tupe e faatino ai fuafuaga a le mafutaga seia vagana le lagolago mai a le kamupani o le Lotto faatasi ai ma ni latou sailiga tupe ona maua lea o se seleni. E momoli ai le latou faafetai i lea kamupani ma lana auaunaga ona ua ia toe foai se seleni e faataunuu ai le aso fanau, e ese mai i ana foai i tausaga taitasi.
Sa latou faafetai foi i le faletua ia Malia Hamani ona o le avanoa ua tatala mai le Toa Pasefika ua maua ai lenei mafutaga mo tuaa matutua. Ta‘ua foi e le faletua ia Miriama e ui i le leai o ni tupe a lenei mafutaga ae o loo vaaia pea le sagisagi fiafia o nai toeaiina ma loomatutua i soo se mea e fai aemaise o a latou tafaoga pe a alu.
