I le 20 tausaga talu ona saini e Samoa le feagaiga e puipuia ai aiā tatau a fanau, le Convention for the Rights of the Child, ae toatele lava tagata i le atunuu e lē o taliaina le feagaiga ona o le upu aiā tatau.
O le mau o loo tauave pea e i latou nei o le aiā tatau, o le pule saoloto o fanau e lē mafai ona toe saofia ai le tiute masani o mātua o le sasa aoai ma faatonu.
Faaalia e le sui Ofisa sili o le Matagaluega o Tina ma Tamaitai Atinae o Nuu ma Afioaga ma Aga Fesootai le susuga Lemalama Tigaina, o le ilitata pea o lagona o nisi i le faaupuina o le feagaiga ma lona faamatalaina, ua faaliliu ai e nisi le feagaiga i ni faaupuga e ofi ma talia gofie ai.
E pei o le feagaiga faavaomalo e puipuia ai faamanuiaga faaletagata soifua (aiā tatau) o fanau.
O faamanuiaga ia e pei o le tatau ona iai se fale e nofo ai le tamaititi, e tatau ona fafaga ma tausi ia ola ma maua se olaga saogalemu, tatau foi ona ave i le aoga ma ave i le falemai pe a maua i ma‘i o le tino.
O le aafia o aiā tatau o fanau ua molimauina i le tele o solitulafono e aliali mai aemaise o le sauāina o nisi o fanau a le atunuu i le tino ma le mafaufau. O le Matagaluega o Tina ma Tamaitai, o loo nafa ma le tausia o le feagaiga i lona tulaga faamalamalamaina i le atunuu ma faia polokalame tala‘i e faatatau i le feagaiga.
O le lua sefulu o tausaga talu foi ona saini lima le atunuu i le feagaiga ua toe agai ai le matagaluega o tina ma tamaitai e toe faamanatu i matagaluega a le Malo, ma faalapotopotoga tuma‘oti aiaiga o le feagaiga ma lona faaaogāina aemaise o le faatāuaina.
O le aoaoga na toe asiasi ai ia matagaluega ma faalapotopotoga i le feagaiga na molimauina ai le fesootai o auaunaga a le tele o matagaluega a le Malo pe a oo ina faamatala aiaiga o le feagaiga o aiā tatau o le fanau.
Faaalia e le sui o le matagaluega o tina ma tamaitai, e tāua tele foi le pitolaau a alii ma faipule e pei ona iai sui o le Malo ma Pulenuu o loo ave i ai le galuega o le faalauiloa i tagata polokalame e faatatau i le feagaiga ina ia mafai ona latou silafia ai.
O le feagaiga lenei ua tele ina asiasi i ai nisi o faaiuga a le faamasinoga pe a molia nisi i mataupu tau aiga e aafia ai le ola saogalemu o fanauiti.
