O se vaitaimi o le tausaga 1991, sa galue si alii talavou o Avaavau i le Pisinisi seevae a se alii Saina, a o faagaioi i Savalalo.
Na sosoo ma le vaaia ua faatau nai seevae i poletito o le faleoloa o Molesi sa iai i na aso, o se isi aso e vaaia ua faaseesee atu i luma o Nelesoni, ma faapea lava ona fetulitulinai solo e kamupani le susuga ia Avaavau Avaavau, ae lei faafiti e usu mai pea i taeao uma, e oo lava i le taeao fua i taimi e faatau ai i‘a i le maketi, ua feiloai ai foi ma le susuga ia Avaavau o faatino si ana pisinisi e tuualaga pea, vaai se seevae o le tama, le tina, poo Tamā ne‘i galo.
O le susuga ia Avaavau Avaavau, o se tasi o avefu‘a a Samoa i nisi taaloga faavaomalo sa auai, sa avea ma sui o Samoa i taaloga a le Olimipeka i Korea, avea ma sui o Amerika Samoa i Taaloga a le Oceania i Tonga 1991, o se tama taalo sa faamoemoe foi i ai mo se pine auro, peitai e lē aveesea ai lava le malaga atu i ia avanoa mauagata, ma taliu mai i Samoa faaauau pea le faatauina o nai pea seevae i se poletito o se faleoloa.
Na faasolo ai ina fai si faaumiumi o ia lisiina pea tafatafa o le Faleoloa o le Ofisa o Faatoaga, seia oo ina suia le nofoaga ua sii i ai le faleoloa o le faatoaga, ae amata matauina ai e tagata ua fai le faleoloa o le susuga ia Avaavau ma si ona faletua ia Ua‘i.
O se nofoaga e tumutumu i taeao uma, e fia maua le koko araisa, maua sina ipu kofe, o nai sanuisi, ua faatele foi le oloa i soo se ituaiga faatau lava e moomia, ae peiseai o seevae lava e faamoemoe i ai a la faatau.
Ua ea ma taumafa le tagata sa fusu ma le tagi, le tagata faamaoni fai mai tago laia e selesele ma le fiafia, ae moe pea ma faatuvaetasi oe le tama ma le teine ua uma mai le aoga e leai se galuega.
E tatau ona faaaogā tatau taimi o le tele o tupulaga talavou ua lē maua ni galuega, ae na o le tafafao ma momoe loloa, o le ā se lumanai? E faafefea pe a oo ina fai se fanau? E mai fea le meaai e fafaga ai? Ia saga faamanuia le Atua ia Avaavau ma le faletua ia Ua‘i ma le nofoaalo. Faamalo le tauivi o lena lava ua selesele faamalo le taumafai.
