O le a faaopoopo i auaunaga ma tautua tau faletupe i lo tatou atunuu le faletupe fou o le ekalesia Faapotopotoga Kerisiano Samoa le EFKS, lea o loo iai le fuafuaga e tatau ona tino mai i totonu o le fā tausaga o loo tapena ai.
O le tasi lea o ekalesia i Samoa o le a liliu e faagaioi lea auaunaga, e ese mai le ekalesia Worship Center i Samoa lava ua mae‘a ona iai le latou fuafuaga e faatū foi se tautua faapea, e lē o se faletupe ae o se tautua tau tupe poo se Finance Service e teu ai seleni a tagata lotu o lea ekalesia ma faatino ai foi isi auaunaga e pei o le nonō atu o seleni i tagata lotu.
E faapena foi le faamoemoe o le ekalesia EFKS, ia teu faafaigaluega seleni a aulotu ma tagata tapuai o le ekalesia i lo latou faletupe ma faatino ai foi isi auaunaga o loo faia e pisinisi tau faletupe.
A o loma lea atinae tele a le ekalesia o se tasi o vaega e fesootai lava ma le faletupe o le a muamua faatino, o se loan scheme poo se faiga lea a le ekalesia e faaaitalafu pe nonō atu ai seleni i tua i tagata lotu ma aulotu.
Ua faaalia e le faailautusi aoao o le ekalesia le susuga Dr Iutisone Salevao, o le fuafuaga lea ia muamua faatino le loan scheme, ae faatoa faatino ai le faletupe mulimuli ane. O le EFKS o se tasi o ekalesia malosi i totonu o Samoa ma atunuu i fafo o loo iai matagaluega ma pulega a le EFKS. A fua i faiga taulaga a ekalesia autū e pei o le Katoliko, Metotisi ma le EFKS i tausaga taitasi, o le Ekalesia Faapotopotoga Kerisiano Samoa e pito maualuga seleni latou te maua.
O lana tupe fesoasoani e ta‘ua o le Toomaga lea e nonō ai aulotu mo a latou galuega tau atinae, e sefulu miliona o loo iai i le taimi nei. O le fuafuaga a faatū le faletupe ona ave lea i ai o le lima miliona mai le Toomaga e amata faafaigaluega ai.
Ua maua i ni nai sailiiliga o le EFKS le isi faisea pito tele lana seleni o loo teu faafaigaluega nei i le faalapotopotoga fou a le Malo o le UTO’s poo le Unit Trust of Samoa. O se faalapotopotoga o loo teu faafaigaluega ai seleni a nisi o le atunuu, ma kamupani ma e lelei tele faamanuiaga tau tupe o loo maua ai pe a oo ina tufatufa le dividend poo le seleni faaopoopo i luga o sea i tausaga taitasi.
O loo numela silia pea le EFKS i tagata o loo lolotu ma tapuai ai, ma e iai foi le talitonuga e toatele tagata faigaluega o le EFKS o loo tautua i le Malo ma pisinisi tuma‘oti. O le talitonuga a oo ina faatino le loan scheme o le a toatele i latou faigaluega o tagata lotu o le ekalesia o le a agai i ai. Ua mautinoa o se faiga tau pisinisi lea e vave tele ona maua ai seleni o le nonō pe faaaitalafu atu i tagata seleni.
Nisi fesoasoani a le EFKS mo ona tagata lotu
$2 miliona tufatufa mo aiga lotu o le EFKS i mafatiaga o le afā Eveni
A o lei amatalia le fuafuaga o le ofisa nonō tupe ma le faletupe, ae o loo faagasolo pea isi fesoasoani a le Ekalesia mo ona tagata lotu. O le matagalueg a Apia i Sasae a le ekalesia EFKS ua amata ai ona tufa atu le fesoasoani tupe e $2 miliona tala a le ekalesia e fesoasoani ai i aiga lotu o le EFKS na mafatia i sauaga a le afā o Eveni. O le ekalesia a Vaiala ma Moataa faapea Faatoia na amata ai le galuega i le vaiaso talu ai, lea e tetele seleni a aiga na tigaina i lologa sa lofia ai o latou laoa ma maota faapea pisinisi. O le seleni maualuga na tuuina atu e valu afe tala i aiga lotu o le ekalesia i Moataa faasolo ane ai lava i le tasi le afe tala mo aiga sa na o nai vaega o fale sa faaleagaina.
O le fesoasoani tupe e lua miliona na pasia i le fonotele i Malua i le tausaga nei ma ua aofia ai ma se vegatupe e fesoasoani ai i malumalu ma fale o ekalesia sa faaleagaina foi i le afā.
O loo faaauau le tufatufaina o lenei meaalofaa tupe seia paia aiga lotu i Faalealili, o Siumu ma le atu Safata.
Faitio nisi aiga i le faasoaina fesoasoani tupe EFKS
Ua tolu aso talu ona faasavali le faasoaina o le fesoasoani tupe a le ekalesia EFKS mo aiga ma aulotu a le ekalesia na aafia i le afā o Eveni, ae ua faaalia le lagomia o nisi finagalo o aiga na maua lea fesoasoani, i le lē fetaui o le faasoaina o le fesoasoani tupe. E tusa ai ma se molimau ua oo mai, e faapea ua oo nisi o sui o ia aiga i le ofisa autū o le ekalesia i Apia e faaoo i ai o latou lagona faaseā. Fai mai nisi o aiga o latou na mafatia tele, ae laitiiti seleni na maua, e fua i nisi aiga e lei tigaina tele ae ua tele atu tupe ua latou maua. O nisi aiga lotu o le ekalesia e faapea na aafia fale i lologa ae e lei avea i le lisi o aiga na afāina.
O le a saili se finagalo o le sooupu o le ekalesia o loo masani ona maua ai faamatalaga i se faamalamalamaga o lea faaletonu ua faaseā ai nisi o aiga. O aiga lotu o le ekalesia i nisi o nuu o le Vaimauga, Safata ma Falealili faapea Siumu sa matuā faatama‘ia laoa ma maota i le malosi o le afā ma lologa ona o tafega a vaitafe. I le lotoifale lava ia o le taulaga, o aiga i nisi o vaega o Apia, Matautu, Maagao, Faatoia, le faasolo atu i Vaiala ma Moataa na aafia tele i lologa ma tafega. E faapena foi nisi o aiga i le atu Safata.
