Ua tautino Frank Mir, lea na tu‘ioti e Mark Hunt i le la fusuaga i le lua vaiaso talu ai i Ausetalia, e malosi atu le tu‘i a Hunt i le tu‘i a soo se tasi lava na la fusu.
Fai mai a ia, “Na tu‘i a‘u e Roy Nelson, na tu‘i a‘u e Junior Dos Santos, ma le toatele o tagata fusu malolosi a le UFC paga mamafa. Ae o le tagata e pito sili ona mamafa lana tu‘i – o Mark Hunt.”
Fai mai a ia, e tuufesili le tele o tagata ia te ia, poo ai e matuā malosi atu lana tu‘i. O lea la ua mafai ona ia taliina lenei fesili, ina ua tu‘ioti o ia e Mark Hunt, i le taamilosaga muamua o le la fusuaga.
O lana faamatalaga lea i le Phone Booth Fighting podcast. Fai mai a ia, o le tu‘i na lavea ai o ia, lea na tau i lona auvae, o le masani lea o tu‘ioti, ae na tau i lona taliga. Na sameme ai ona vae, ma faalogoina le tatagi o logo i lona taliga. Na valea ai foi lana tu. Ma e matuā lē iloa lava e ia le mea na tupu. O le tauviivii lea o Mir ia Hunt, e faaali mai ai iina le silasila toto‘a o lenei alii ma lona lē faa‘au‘au i lē na faapalasiina o ia i le maea.
I le taaloga ua ta‘ua o le Manumalo o le Savali i Tua, na faatino ai e Hunt le uiga sa‘o o lea faaupuga. O le tu‘ioti lea o lana paga, tasi lava le tu‘i e aunoa ma le toe popole i se toe faaopoopo o nisi i le tagata ua pa‘ū.
Na ta‘ua foi e Mir i lana talanoaga lea, e leai se faaletonu o le taaloga a le UFC. Fai mai a ia e popole fua tagata i le faaletonu ai o le mafaufau ma le manu‘a o le ulu, ae peitai e sefe atu le taaloga o le UFC nai lo isi taaloga.
Ua taumafai nei Frank Mir, e toe saili le toe alu i luga o lona faamoemoe i le taaloga. Ae o le manumalo o Hunt ua sii ai nei lona tulaga i le numer 8 a le UFC, ae ua tumau i le 9 Frank Mir. Ma o loo faatalitali nei foi Hunt i se isi ana fusuaga a o loma lana fusuaga mo le fusi a le UFC.
Na ta‘ua foi e Hunt, e lē popole o ia poo ai. Na ia ta‘ua, e manaia pe afai o se isi o le vaega lea e i le toalima muamua a le UFC.
Na iai le avanoa na tatala mo le isi fusuaga i le faaiuga o le masina o Aperila i le UFC197, peitai ua toe tapunia lea avanoa. I lea taamilosaga, na tuu e fusu ai Jon Jones ma Daniel Cormier, peitai ua lē mafai ona fusu Cormier, ona sue ai lea o se isi e faaauauina le fusuaga a Jones.
I le sogasogā la o le toa a le atunuu lea na ia taliina ai le valaau mo se isi e fusu ma Jones. Na taumafai Mark Hunt e maua le avanoa lea, peitai e foliga mai ua toe maua le isi paga a Jon Jones.
O le isi avanoa o loo fia maua nei e Hunt, o le fusuaga muamua lea a le UFC o loo fuafuaina mo New York. Ua tatala nei e le Setete i New York le avanoa e fai ai fusuaga a le UFC i le Setete, auā o lea sa faasā.
O lena faamoemoe, e mo le masina o Novema i le tausaga nei, ma o loo taumafai loa la Mark Hunt e saili sana paga mo lea taamilosaga. O le fusuaga i New York, o se tulaga tupe tele lea pe a maua se avanoa e fusu ai. E matuā toatele foi i latou o le a sailia se avanoa e fusu ai i le fusuaga muamua i New York. O loo faamoemoe le atalii o le atunuu, o le a maua se avanoa e toe faaemo atu ai, o ia lava e matuā tu‘i malosi i totonu o le UFC.
