E mae‘a semifinal ole Ipu autu ile Aso Toonai ua mavae, ae ua lē mautonu ai foi ma lagona o tagata tapuai poo ai ole Apia Maroons male Malisi ole a siamupini ile taamilosaga ole Aukilani Samoa i lenei tausaga, auā foi o ‘au nei e lua sa tatalaina le taaloga ole talita ile amataga ole taamilosaga ae o lea foi ua toe saili iai le sailiga ole siamupini.
I lagona o tagata matamata na iai ile Aso Toonai, e foliga mai e mafuli lo latou lagolago ile Apia Maroon ile faatusatusa atu lea ile la taaloga male Nations e toafā sa tutuli i tua ae lei mafai lava ele Nations ona laasia le laina sikoa ale Apia Maroons.
Semi Final muamua ile va ole Apia Maroon male Nations
E maofa le aumatamata ile malosi sa iai le Apia Maroon ile faatinoina ole taaloga ile ‘afa lona lua, lea e lei leva ona amata ae tutuli i tua le toafā o lana ‘au ile 10 minute ina ua fusu le taaloga, ae toatasi le Nations.
Ile popole sa iai le ‘au matamata ale Apia Maroon ina ua vaai atu ua lē maua numera ole ‘au e tatau ona taaalo ai. Ae ole malosi foi lea ole feei mai ole tapuaiga ale Nations e tatau ona latou laasia ni sikoa se tele ona o lea ua taalo 11 le Apia Maroons.
Ose taaloga mataina ae lei faaitiitia ai le loto tele ole faiaoga ale Apia Maroon le alii o Fomai, ile faalototeleina lea o tama taaalo e puipui le malosi ole osofai mai ole Nations ina ia aua ne‘i laasia le laina sikoa.
Na faafaigata e tagata na molimauina le taaloga lenei ona latou talitonuina le manumalo ole Apia Maroons ile ata lea sa latou viliina ile taaalo 11, ae lei laasia ai lava e Nations lana laina sikoa. E mae‘a le taaloga o tumau pea ‘ai ile 3 ale Nations ile 15 ale Apia Maroon.
Toe mamulu ese mai le talita ma lima o Saleimoa
Ile semifinal lona lua ile va o Malisi ma Saleimoa ma ole taaloga foi lea ole talita, na faitau uma ai lagona o tagata ua leai se talita ma lima o Malisi. Ose taaloga mataina ile maimoa ole atunuu ma ua faatumulia uma ai itu e fā ole malae No 3 sa fafoe ai le taaloga.
E mae‘a le ‘afa muamua oloo 7 ai o Malisi ile 6 a Saleimoa. Amata le ‘afa lona lua ole taaloga na toe osofai malosi ai Malisi ma toe laasia le laina sikoa a Saleimoa, ma tulai mai ai ile 14 ile 6.
Na maua isi ‘ai faaopoopo e 3 mo Saleimoa ina ua ova le kiki ale numera 10 ile pou ma see atu ai ile 9 a Saleimoa. E lei faaitiitia pea le osofai malosi o Saleimoa i lea taimi ma latou laasia ai loa le laina sikoa a Malisi ma tutusa ai loa ‘ai ole taaloga ile ta‘i 14.
Na faatalitali ile kiki ile pou ale uigi numera 14, auā ole oti lea male ola mo Saleimoa auā na ole 7minute o totoe ole taaloga.
Na fifilemu uma tagata i lea taimi ae silasila toto‘a ile malae, na manuia le taumafaiga ale uigi ile pou ma suia ai ‘ai ole taaloga ile 14 Malisi ile 16 a Saleimoa. Ole faitau a tagata i lea taimi ua pepese Saleimoa ae faanoanoa Malisi.
Ile minute e tasi mulimuli ole taaloga ma ua faatalitali ai foi tagata ile taimi e pe ai le polo ma iloa ai le ‘au e manumalo, ae toe sala ai loa Saleimoa faafesagai male pou ma finau ai loa le numera 10 e kiki ile pou auā se ‘ai faaopoopo mo Malisi, ma ole ola foi lea male oti mo Malisi i lea taimi.
Na faateia tagata matamata ile vaelua tutusa ole pou ile kiki ma toe suia ai loa ‘ai ole taaloga ile 17 Malisi ile 16 Saleimoa ma uma ai loa male taaloga. Ua see atu nei Malisi ma Apia Maroon e finauina le sueina ole siamupini ae o Saleimoa male Nations ile tulaga tolu male fā.
