Ua lē toe po se lilo ile faiaoga fou ale Samoa Sevens. Ua faamaonia ai nei le avea o Sir Gordon Tietjens ma faiaoga ale Taitoafitu ale Atunuu.
Ole faaletonu na faailoa foi e Kenya, le filifilia o Tietjens e avea ma a latou faiaoga. Ae ua faailoa foi le sailia e Fiti o Tietjens mo le latou ‘au.
O Tietjens na avea ma faiaoga a Niu Sila mo le 22 tausaga mai le 1994 ile tausaga nei. E 12 ana manumalo ile Taitoafitu ale Lalolagi, faaopoopo iai ma Pine Auro e 4 ale Commonwealth Games.
Peitai, e lei ausia e Niu Sila le Pine Auro i taaloga ole Olimipeka i Rio. E na ole tulaga lima na oo iai le taumafai a Niu Sila, ma faamuta ai loa male tulaga o Tietjens ile taitoafitu a Niu Sila.
Ole filifilia o Tietjens ose tulaga taumate lea na oo iai le atunuu male SRU. Na matuā faafiti le pulega ale SRU e lē o vaai Samoa ia Tietjens e avea ma faiaoga ale Samoa Sevens. Ae ole malaga atu a Tietjens i Samoa male taunuu atu ile malaevaalele i Faleolo ile po ole Aso Lulu, na mateia ai le tupua na faafiti iai le Iuni lakapi a Samoa.
E ui na ia ta‘ua (Tietjens) na ole sau e asiasi mai i Samoa, ae ole iai ole CEO ale Iuni Lakapi ile malaevaalele ile po ole Aso Lulu e faatali Sir Gordon, na afua ai masaloga.
E ui foi na faafiti le SRU ile apalai o Tietjens ile avanoa ae na ioe le CEO, Afioga Faleomavaega Vincent Fepuleai ile apalai o Tietjens ile avanoa. Peitai, na ia ta‘ua foi e lei faamaonia se mea e tasi, faatoa faamaonia lava ile taimi e faasalalau ai le faiaoga ole a filifilia. Ole susuga Stephen Betham ua filifilia e avea ma faiaoga fesoasoani ia Tietjens. E tele le tuufesili ale atunuu ile filifilia o Tietjens mo lenei avanoa pe o iai ia te ia le tomai e tulei ai Samoa i luga ole taamilosaga ale lalolagi.
Ae lē gata i lea, ole matua o lona soifua, ua 60 o ona tausaga. Peitai, na faailoa e Tietjens, e ui na faamalolo o ia mai le faiaoga ale NZ Sevens, ae e lei uma ai lona aogā mole taaloga. E lua isi atunuu na mananao mo Tietjens e aofia ai Fiti ma Kenya.
Faailoa foi e Sir Gordon lona lē fiafia i le NZRU, le Iuni Lakapi a Niu Sila. Fai mai a ia, e lei amanaia tele ele NZRU le polokalame ale Sevens. Ae ole avanoa e avea ai o ia ma faiaoga ale Samoa Sevens ose mea lelei lea mo ia i lenei taimi o lona olaga.
O lana taumafaiga ole maua lea ole avanoa a Samoa ile Olimipeka i Tokyo ile 2020. E ui na ole tasi le tausaga oloo saini ai le konekarate.
Na ta‘ua foi e Tietjens, o lona saini ai e faiaoga mo Samoa, e iai tulaga lelei mo ia e mafai ona ia faasoa atu mo le au a Samoa. Ta‘ua foi e Tietjens le tele o taimi na galulue faatasi ai ma Samoa i isi itu ole taaloga.
Ae lē gata i lea, e masani tele o ia ile a‘oina ma toleniga o tama taalo mai le Pasefika, faatasi ai ma le toatele o alo o Samoa na taaalo i le Ta’ito’a Fitu a Niu Sila. O vaega ‘autu ia o lana faaiuga e faiaoga mo Samoa ma lona faamoemoe e unai le ‘au ale atunuu ia oo lona malosi ile tulaga oloo iai nei Fiti.
E 12 masina le umi ole konikarate, ma e amata ile masina o Ianuari 2017. O lona uiga, e lē avanoa mole taamilosaga muamua ma lona lua i Dubai ma Aferika i Saute. Ole susuga ia Stephen Betham ole a faatautia taamilosaga amata ale Samoa Sevens ile masina fou.
