Ua faailoa e le soifua maloloina a le lalolagi le World Health Organization, i ni faamaumauga lata mai a lea faalapotopotoga tele a le lalolagi, atunuu e sefulu pito i luga o le lalolagi ua ogaoga tele ona aafiaga i le tino puta, ma o Samoa o loo numera lima i le aofaiga lea.
O atunuu lava o le Pasefika o loo lilifa i ai lea tulaga, ma o Samoa o loo numera lima. E fai lea faamaumauga ae o le Atu Kuki o loo pito maualuga ai le numera o tagata puputa e 50 tesimale 0 pasene, sosoo atu i ai le atunuu o Palau ma Nauru e 45 pasene, Samoa, Tonga ma Niue e 43 pasene, ma Kilipati ma Tuvalu e 40 pasene.
O se ata manino lea e pei ona faaalia e le faalapotopotoga o le soifua maloloina o le lalolagi o le saosaoa o aafiaga o atunuu nei i faama‘i lē pipisi poo non commutable diseases.
O Samoa lava ia ua iai nei ni taumafaiga e faaitiitia ai ia faama‘i lē pipisi e pei ona faagasolo polokalame eseese, e pei o le taumafa i meaai talafeagai ma paleni, ma ua iai foi ma taumafaiga e unaia faamalositino, ae o le faamalositino sili ona tāua o le faia o feau masani i le aiga e faagaioi ai le tino ma alu ai le afu.
O le amataga o le tausaga nei 2015, na faalauiloa ai le polokalame o le No Obesity o loo lagolago i ai le faleoloa e faatau ai oloa manaomia i ofisa ma fanau aoga o le Business System Limited le BSL.
O se polokalame ua unaia ai fanau laiti ma tupulaga talavou e faatino taaloga ma faamalositino e tineia ai faama‘i lē pipisi e pei o le tino puta.
O le molimau a le matagaluega o le soifua maloloina i Samoa, o suiga televavave i le soifuaga o tagata o se tasi lea o pogai o nei faama‘i. Ua malaga mai le toatele ma nonofo i fanua i nuu tu taulaga ma o le toatele foi oi latou ua maua galuega maua ai seleni, ma ua faigofie ona maua ai taumafa eseese.
Pe a silasila i le toatele ua nonofo i le taulaga ma ua siitia ai ma le soifuaga, ua vave tele ona oo ai le soifuaga i suiga fou. O le tele o aiga ua tofu taavale, ua faigofie ona feoai ai i isi nofoaga. Ua lē toe savavali ai le toatele ma o le isi lea mafuaaga o le vave o le sitia o le tino puta.
O mau fale‘aiga eseese, o pisinisi e maua ai soo se ituaiga o taumafa suamalie ua lolofi i ai le atunuu e taumamafa ai, le isi lea mafuaaga. E pei foi ona silafia ua faatupula‘ia fale‘aiga e maua ai taumafa lololo ma ga‘oa e pei o fish and chips, o nisi ia o nofoaga e tumutumu i ai le atunuu.
Talosia ia aveavea‘i pea le galuega tau logologo a le soifua maloloina ma logosaia e o tatou tagata, auā ua tatou molimauina le maliliu talavou o nisi i faama‘i e pei o le suka, toto maualuga, le gasegase o le fatu, ma le gugu.
