O le tiga ma le maini o le au na liua i le fiafia ina ua taunuu le faalepo ua leva ona moemiti i ai le tamaitai poo le tina ia Frances Amituana‘i o se alo e faasino i le Afioga Aiolupotea Fualau Siaosi Amituana‘i ma le faletua ia Usipua Aiolupotea Amituana‘i.
O le Aso Faraile aso 15 o Me na samaina ai le malu a Frances. E 2 aso na faatinoina ai le galuega sa feagai ma le Afioga Tulouena Laulu Andre ma le falelua o le latou aiga Salemalama.
O le susuga ia Faleu Tausa Futi sa ia taitaia le sauniga lotu mo lea faamoemoe. Na mae‘a le sauniga lotu ona faia lea o le taumafataga, sosoo ai ma le alo atu loa i faaaloaloga e pei ona masani ai i aso faapenei; ma o le Tofa Talo Tuu Ofisa Tele‘a sa fai ma fofoga o lea afiafi.
Sa faatumulia lenei faamoemoe i uo ma paaga aemaise o le aiga o Frances. E momoli ai le faafetai tele a Frances i le tina ia Ioana Paulo Alae mo le tapuaiga aemaise le tina ia Usipua e lei auai mai ona o le lē atoatoa o le malosi o le tino, aemaise foi o uo ma aiga sa faapea ona auai mai i lea afiafi.
O le viiga ma le faafetai e ave i le Atua ona sa ia amataina lenei faamoemoe seia oo ina ua faaiuina. Faafetai faafetai tele lava.
