Na ia misia le meaalofa a lona tamā

O Iosia ma Siera o se ulugalii e maumea, ma e galulue uma i le la pisinisi faatau meaafale. E toatasi le la tama, lea na la faaigoa i le igoa o le tama o Iosia, le toeaina o Pita Moata.
O le aso na fanau ai le alii o Pita, na oo i le lagi le olioli o le tamaloa o Iosia, ma na molimau uma tamaitai fomai na iai i lena aso i le faafanauina o Siera, a o tootuli ifo le tamaloa i autafa o le moega o lona toalua, ma tatalo atu ma loimata o le fiafia i le Atua, e sii le faafetai ina ua faamanuiaina i laua i lenei atalii.
E ui foi i se faanaunauga lilo o le fafine o Siera e fia maua sana purinisese, ae sa faamalieina lava o ia i lenei tofi mai le Atua, aua o ai na iluilu talutalu o le a fanau mai ia te ia se perenise e ola maloloina? O le olaga atoa o Siera a o lei faitoalua, sa tele ina ma‘i, ma misi soo ana aoga, ona e le o se teine aumalosi e pei o isi teineiti o le latou nuu.
Peitai, ina ua nonofo Siera ma le alii faipisinisi o Iosia, na amata ai ona matauina e matua o Siera ua malosi le teine; ua seasea toe mai, seia oo ai lava ina fanau mai lana pepe, ma na molimauina e fomai o se pepe e ola maloloina.
Fua foi lena e lei atoa se tolu ni aso ae faailoa ane e fomai, ua tatau ona tea i tua le failele ma le pepe fou.
A o faasolo ae pea le olaga o Pita, o se tamaitiiti sa lei faaletonu se mea e tasi i le faatinoga o lana aoga. Ua oo aoga a Pita i se kolisi maualuga a lona atunuu, ma na matauina pea e le ulugalii le atamai o le la tama i lana aoga.
O le isi lea mitamitaga i le tamaloa o Iosia, aua ua fanau mai ia te ia se tama e atamai, ma ua faaata nei i le mafaufau o le tamaloa, le ono tulai mai o lona atalii i se tofi aloaia i lona atunuu pe afai ae aveaveai le lelei o ana aoaoga.
A o faasolo ina faaiuiu aoaoga a Pita, sa ia iloa lelei e le mafai ona tuua e lona tama se mea e manao ai, aemaise o loo fiafia ona matua i iuga o ana suega. Mo le tele o ni masina pe a tuua le aoga a Pita, e taunuu ane loa i le taulaga, faasolo lana matamataga i faleoloa. Ma o luma lava o le fale faatau taavale a le Toyota e tele ina tutu ai Pita ma matai le felanulanuai o taavale fou a le kamupani.
Na momoo Pita i se pikiapu fauili (4WD) lanu meamata, lea ua ia faaata nei i lona mafaufau le taimi e tietie atu ai i lana Toyota agai i le iunivesite lea e mautinoa o le a au i ai, a o tilotilo ane ma le maofa tama ma teine o le aoga. “Ou te iloa, o i lava e upe uma mai ai teineiti o le iuni ia te au!”
Ua tau le mafaufau o Pita i ona matua, ma lona manaoga lea ua faafatuulu nei i le mafaufau i taimi uma.
“Ou te iloa afai e lelei lou tulaga i lau suega, e mautinoa lava e faatau e Papa le taavale lea mo au, aua e tele tupe a ou matua.” Ina ua uma le taumafataga o le afiafi a le aiga i se tasi aso, ona momoli loa lea o le fanoga o Iosia i lona tama, e uiga i le pikiapu fauili a le Toyota. Na folafola foi e Pita i lona tama, e na o le pau lava lea o lona manaoga, o sana taavale e agai atu ai i le iunivesite i le tausaga fou.
Ua oo mai le aso o le faauuga ma ua mautinoa foi e Pita e manuia lana suega, aua o loo aofia lona igoa i tamaiti e toalima muamua (Top Five) e maua faailoga faapitoa.
Sa fiafia Pita i iuga o ana suega, ae o le silisili o lona fiafia, ua ia mautinoa nei o le a ia uuina le foeuli o le pikiapu fauili! Ua malama le taeao o le faauuga, ma ua uma foi ona sauni lelei le ofu faauu talaloa o le atalii e toatasi o Iosia ma Siera.
Peitai a o lei agai le aiga i le nofoaga mo le faauuga, sa aami atu e le tamaloa o Iosia lona atalii i lona ofisa. “Oi tai faafetai,…. o lau taavale moi lea o le a tau mai e Papa ua faatau,” o mafaufauga nei o Iosia a o savali atu i le ofisa o lona tama.
Ua ulufale le tama, ona ea ae lea o le tamaloa o Iosia ma faapea mai: “Atalii, a o tatou lei o atu mo lou faauuga, ou te fia muamua ona momoli tele atu le ma faafetai ma lou Siera ia te oe, ona o lou faaeaea matua ma le aiga.
E silafia e le Atua le mitamita o o ma lagona ma lou tina i lenei taimi, a o ma molimautino i fua vaaia o lona alofa ia i maua. Faafetai mo au taumafaiga.”
Ina ua uma upu nei a le tamaloa o Iosia, ona ia toso lea o le pusatoso o lana kesi, ua sei ae i fafo se pusa meaalofa ua matua matagofie ona afifi, ma tuu atu i lona atalii. Ua faataupupula le tama i le pusa, o loo manumi lona muaulu e pei o se tasi o loo naunau e fia iloa le mea o i totonu, ae o ona siumata ua iloa atu ai lana pupula faasiasia e peiseai ua le o fiafia. Ua matala le pusa ma vaaia ai e le tama se Tusi Paia e faavaa i se pau manu enaena matagofie, ma lona igoa ua lolomi ai i le lanu auro, “Pita I Moata”.
E lei poi lava le atalii, ae ua toe liai vave atu le pupula ua lotoa i lona tama e aunoa ma se tatalaina o le Tusi Paia, ona leoleoa atu lea, “Oka se kele o au kupe, ae ga o le pau legei o le mea e ke aumaia ia ke au, ga o le Kusi Paia?” ua toe faapalasi e le tama le Tusi Paia i luga o le laulau a lona tama, ua soona vau ona lima ma masau ese loa i fafo mai le latou fale; ma o ina lava na muta ai ma le faauuga a le aiga.
Ua faasolo pea tausaga, ua iu foi aoaoga faaiunivesite a le tama o Pita seia oo ina faigaluega. Sa manuia foi ana taumafaiga uma i galuega na galue ai, seia oo ai lava ina faatu lona lava ofisa suetusi. Ua faaipoipo atu Pita i le tasi o tamaitai loia o Rita lea sa la aooga i le iunivesite, ma e toatolu o la alo. I se tasi aso ua le matua pisi tele galuega, ona nofonofo lea o Pita ma toe faasolo ona mafaufauga i ona matua, aemaise si ona tamā lea ua faalogo ua ma‘i.
Ona ia mafaufau lea, atonu e sili ia ona alu sei asi lona tamā!
Manatua, o le taimi mulimuli lava na fevaaiai ai le tama o Pita ma lona tamā, o le aso o lona faauuga lea na teva ese ai mai lo latou aiga. Peitai, a o lei faataunuu le malaga a Pita i lona aiga, na faateia o ia i se tasi o aso a o amata siaki ana imeli, ina ua aliali mai ai se imeli mai le loia a lona tamā, le alii o Ioane, e logo mai ai ua maliu le toeaina o Iosia, ae o ana meatotino uma o loo uili i lona atalii o Pita.
Ma ua moomia ai ona faia se feiloaiga vave a Pita ma le loia sei faatulaga mea uma mo lona aiga.
Na faatopetope atu nei Pita i le fale o ona matua, ma a o amata ona savali atu le tama i totonu o le latou fale, na faafuasei lava ona puna ae ona lagona ua matua lofituina i le faanoanoa. 
Ua savali atu pea ma ulufale loa i le ofisa o lona tamā. Ua toso auauai i fafo pusatoso o kapoti o loo iai faila ma pepa taua a le toeaina, ma na faateia o ia ina ua toso mai le isi kapoti, ae ia vaaia ai le Tusi Paia lava lea na faimeaalofa ane ai si ona tamā, o loo tuu pea i totonu o le pusa meaalofa na afifi ai mo ia, ma o loo fou pea foliga o le tusi, atonu o le taatia lava lea na iai i le taimi na toe faapalasi ai i lalo e Pita ae teva ese i le sefulu tausaga ua mavae.
Ua saofai ifo le tama, ua maligi ona loimata, ona tago atu lea ua sii ae i luga le Tusi Paia ma afisi mai i lona fatafata. Ua toe faasolo uma i lana faaata faalemafaufau le saofai mai o si ona tamā i le isi itu lea o lana kesi ma momoli mai lana faafetai, a o ia tutulalai ma avaavau atu i ai ina ua tuu mai le Tusi Paia ia te ia, nai lo le ki o le fauili lea sa faananau i ai.
E atoa lelei le sefulu minute o saofai pea le tama ma uumau le Tusi Paia, ona sei ae lea o lona solosolo, ua soloi ona loimata ma talatala lemu le tusi.
E lei tolu ni susue a le tama i le tusi, ae faafuasei ona pau ifo i fafo se ki o le taavale. I lea ki, o loo tautau ai se pepa, o le faailoilo a le kamupani taavale o le “Toyota”, le kamupani tonu e iai le pikiapu fauili lea sa moomoo i ai le tama.
Ua fuli e Pita le isi itu o le pepa ma iloa ai, o le aso tonu na faatau ai le taavale, o le aso lava lea o lona faauuga, faatasi ai ma upu o loo tusia ai UA TOTOGI ATOA LE TAU.
Ua punou ifo le tama ma tagi aueue. Pagā se faanoanoa! Pagā se salamō! Pagā se lē onosai! O lea lava sa faataunuu e si ona tamā lona manao, ae sa afifi mai i totonu o le Tusi Paia, lea na manao lona tamā ia muamua ona tepa i ai e fai mona tapasa, a o lei faaaogaina lana meaalofa, o lana pikiapu fauili.
Ua faafia ona tatou misia meaalofa ma faamanuiaga o loo tali mai ai lo tatou Tamā Silisiliese i le lagi ia tatou tatalo, talu ai lo tatou lē onosai, lo tatou vavevave e feita ma faitio pe a lē maua tonu mai se mea na tatou faatalitalia e tatau ona tali mai ai le Atua ia tatou tatalo?