Toleniga a Anthony Joshua ile masina o Tesema

Toleniga a Anthony Joshua ile masina o Tesema

Ole ogatotonu o Ianuari na faatoa saini lima ai Lupesoliai Laauli Joseph Parker ma Anthony Joshua mo le la fusuaga ile masina o Mati. Ae na amata ile amataga o Tesema 2017 tapenapenaga a Joshua mo le fusuaga. O lona uiga e saini lima laua ae ua ova ma le ono vaiaso talu ona amata toleniga a Joshua.

E foliga na toso e Eddie Hearn le pulega a Anthony Joshua le feagaiga ina ia faapuupuu le taimi tapena a Parker. Na amata mai lava ile amataga o Tesema na ta’uta’u le ioega, peitai na tosotoso lava e Hearn le ioega mo le isi fā vaiaso.

A’o faatalitali le sainigalima, na faapea foi ona faatalitali le amatalia o toleniga a Joseph Parker, ae ole la ua leva ona fai tapenaga a Anthony Joshua.

Auā o Parker ma Kevin Barry, na faatoa o i Las Vegas e amata a la toleniga ina ua mae’a ona lulu lima alii fusu ia e toalua.

O lona uiga ole vaiaso mulimuli o Ianuari na faatoa amata ai tapenaga a Parker, faatusa ia Joshua na amata ile amataga o Tesema.

Na ta’ua e Kevin Barry, e na’o le valu vaiaso ole tuufaatasiga, poo le Camp ole a fai nei. E fai lava la si puupuu faatusa ile maoa’e ole fusuaga ole a feagai ai nei ma Parker.

Ile fesiligia o Kevin Barry ele Samoa Times ile masina ua tea nei, na ia ta’ua ai na fai lava toleniga a Joseph i NZ, a’o lei faia le Kerisimasi. Peitai, ile taimi na saini ai le feagaiga i Lonetona, na mautinoa lava le faaopoopo o pauna o Parker.

Ole manao o Kevin Barry ia pa’ū ile 107 kilokalama le mamafa o Parker mo le fusuaga. Faatusa lea ile 112 na fusu ai ma Hughie Fury, faapea ma Razvan Cojanu. E 109 na fusu ai ma Carlos Takam.

E ui la na faaopoopo pauna o Parker ile taimi ole Kerisimasi ae e lē o popole iai Barry. Fai mai e sili ai le ova o pauna i lo ole paee. Auā a amata loa toleniga, e matuā maai ai le gaoioi a Parker.

Na ta’ua foi e Barry, e matuā vave lava ona lusi pauna o Parker, auā e galue malosi o ia i totonu ole maea. E lē o popole la ia ile tulaga lea.

A’o Joshua, na amata lava ana toleniga ile masina o Tesema. Ole manao ole faiaoga a Joshua ia pa’ū lona mamafa ile 108 kilokalama. E mafua lea ona ole manao ole faiaoga ia vave le gaoioi a Joshua i totonu ole maea.

Ole faaletonu lea na faifai e Parker ma Duco Events, e tuai le gaioi a Joshua i totonu ole maea ona ole masoa ma le telē o lona tino. Na vaaia lea ile fusuaga ma Carlos Takam, le tuai ole gaoioi a Joshua.

E faapea foi le polokalame mo Parker. Ole manao ai ole faiaoga ina ia vave lusi ana pauna. Ua ta’ua e Joseph Parker ma faapea foi Kevin Barry ole a vave le amataga ole fusuaga. Ole a pei ole emo ole mata taamilosaga muamua. Ole a tulei foi e Parker le fusuaga mai lava ile amataga.

Ole manao lea o Parker ina ia faavave gaoioi le tino mamafa o Joshua, aemaise le togi o ona lima masoa ma vave mamafa ai maso ole Peretania. Ole faamoemoe tele lea mo Parker, ole faatonutonu e ia ole fusuaga ae e lē ole faatali ia Anthony Joshua e sau ia te ia.

Ole mea tonu lea ua vave amata ai toleniga a Anthony Joshua ina ia faalaititi lona tino, ma tapena lelei ia lava lana mānava i totonu ole maea auā le fusuaga ma Parker.