Ole Aso Toonai 3 Fepuari na faatumulia ai le Aotea Lagoon i Porirua ina ua papae le ausavali malosi ale Laumua o Niu Sila lea ua ofi atu nei i faagatama ale Walking Samoans.
E silia ma le 50 i latou na auai e aofia ai le Sui Pulenuu o Porirua, Izzy Ford faapea le faafeagaiga EFKS Porirua ia Rev. Nove Vailaau ma le faletua ia Penina ma le mamalu o tupu ma e’e o lo tatou atunuu faapea faletua ma tausi aemaise le malosi i alo ma fanau.
Saunoa le susuga ia Siaosi Anamani ole tasi o taitai ole kalapu a Porirua, “O soo se faamoemoe mo le soifua maloloina e amata ile laa e tasi.” Ole ofi atu o Porirua ua atoa ai nei le 14 o kalapu savali Walking Samoans i Niu Sila. E 12 oloo i Aukilani, tasi i Palmerston North ma le tasi lea ua iai nei i Porirua.
Saunoa Martin Mariota oloo toalua iai taitai, “Ole amataina ole kalapu a Porirua ona ole faamoemoe e unaia o tatou tagata Samoa aemaise le lautele o tagata Pasefika ina ia faatāuaina lo latou soifua maloloina.”
Toe saunoa Siaosi, “E iai le faanaunauga ole a mafai ona avea savaliga i taeao 8am i Aso Toonai ma auala e faailoa atu ai foi i o tatou tagata auaunaga tau soifua maloloina oloo iai i Porirua e agai iai.”
Ole Aso Toonai 24 Fepuari e pa’ū faatasi ma le 2018 Creekfest ma ole a tatala aloaia ai le kalapu a Porirua lea oloo fuafua e auai nisi o komiti mai Aukilani.
O lenei tala fiafia ua avea ma fesoasoani i lagona mafatia oloo ufitia ai kalapu uma ale Walking Samoans ona ole afe moe ole folauga a se tasi o poutu, le tofa Malagamalii Alefosio.
Fetalai le Faatonu ole Walking Samoans, tofa Sooalo Setu Mua, “Ole mea moni ana lē maliu Malagamalii, ole isi lea o sui ole komiti mai Aukilani e malaga mo le tatalaina aloaia ole savali a Porirua.”
Ole faasologa lenei o savali i vaiaso taitasi:
Porirua 8am i Aso Toonai ile Aotea Lagoon
Palmerston North 6pm i Aso Lulu
Whau-Avondale 8am i Aso Faraile
& Aso Toonai
Mangere 9:30an i Aso Lua
Clendon 9:30am i Aso Gafua & Aso Lulu
Otara 9:30am i Aso Tofi
Tamaki 9:30am i Aso Lulu
Henderson 6am i Aso Sa ma le 6:30pm i
Aso Tofi
Manukau 11:30am i Aso Faraile
Mangere Bridge 9am i Aso Gafua & Aso Lulu
Manurewa 9:30am i Aso Faraile
Central e lei mautu lo latou aso savali.
Ile usufono ai ole tofa ia Malagamalii lea e taitaia le ausavali ale Malagamalii Special mo i latou e lē atoatoa le malosi ua avanoa ai se isi e taitai.
Faaalia ele Faatonu ole Walking Samoans, le fetalaiga Teleiai Edwin Puni, “E faafetaia ai le afioga ia Galumalemana Tai Galumalemana ma le afioga ia Leaupepe Tala’i Lene lea ua tulai e faaauauina le galuega a Malagamalii.”
Ua moni ai le upu a faleupolu, “Ua pa’ū se toa ae tulai se toa.”
