O le tamā ia Siliato, e ana le fale na faatama’ia e le afi

O le tamā ia Siliato, e ana le fale na faatama’ia e le afi

E valu ulugalii, ae silia i le 20 tamaiti e masani ona nonofo faatasi uma ai i maota ia ua faatamaia e le afi. O le mu faatasi ai o maota e lua e aofia ai ma le fale faato’a uma ona sosoo ma faafou mai tupe aitalafu ua saga fememea’i ai lava aiga i Tauese e ana maota ua aafia.

E mu le maota o le aiga lenei, ae o le taimi lea o loo faatalanoa le faiga o peimeni a le tamā ia Siliato ma lona auaiga, e aofia ai lana fanau, ma uso o lona faletua, faapea tuagane ma le latou auaiga atoa.

O se vaega o peimeni nei e le gata ina ao ma faaputuputu, ae o isi foi e tala i tua. Peitai o le taeao lea na ao mai ai se vaega o tupe e totogi ai aitalafu o le maota lenei, a’o lei mu. O le isi vaega fou lea na faatele ai le fale o loo toe tau totogi ai le aitalafu, ae paga lea, ua le tusa ai fuafuaga ma mea e tutupu faafuase’i i lea taeao. Na talanoa le susuga Siliato o le faatamā o lenei auaiga, na uma loa ona maua le tupe $900 tala, alu loa sulu i lalo o lona moega i le taeao lava lea. Ae masani ai lava, e oo atu i le $2 i le $3 afe a latou peimeni e fai i le vaiaso. O le fale lea na fai mai lona aitalafu i tupe o le polokalame a le Ekalesia Aso Fitu o le Toe Afio Mai i Lalolavea. Ma e lei taitai lava ona uma na totogi le aitalafu.

Peitai, na ia ta’ua foi, “O tatou, tatou te magumagu uma lava ia tatou meatotino. Ae e leai ma se mea na magumagu iai, e pau le mea sili ona tāua o loo saogalemu lana fanau. E pau lava lena o lana tatalo faafetai i le Atua o loo sao uma mai lana fanau. E tupu le faaletonu lea ua o uma tamaiti i le aoga, ae o le laki foi o le tupu o le mu ua malamalama. Aua e le iloa pefea pe ana mu ane le fale o pogisa o loo momoe tamaiti.

Popolega i le soifua o le tina o le aiga

E lei manuia le taumafaiga a le tasi o le fanau e sefe mai le masini e faalagolago iai le soifua o le latou tina. Na ta’ua e le tamaitai lea, o lona popolega o iai i le taimi nei, ona ua mu atu ai ma le masini e faaaoga e lona tina i taimi e faaletonu ai lana manava. O le masini ua mu, na tuu e lei alu lona tina ma ave. O le tina o le aiga na malaga atu i Amerika Samoa i fuafuaga faaleaiga.

Na ta’ua foi e le tamaitai lea e faapea “E ova le toatele o le matou aiga, o luma i le fale tele, e lima ulugalii ma fanau, ae o tua e 3 ulugalii ma fanau, o le isi ulugalii e 5 tamaiti, o le isi ulugalii e 4, ma le isi ulugalii e 5, ma le 5 a le isi ulugalii, ae 4 ma le tolu isi ulugalii. E silia i le 20 tamaiti ma o latou mātua.

E leai ma se meafale, poo ni lavalava na mafai ona faasaoina. O meafale e aofia ai moega, pusa aisa, ogaumu uila, microwave, auli, ipu, sefe, ma isi, na alu uma lava i le malaia i lea taeao.

O le lona lima ai lenei o aso talu ona tupu le faalavelave, o le umi lena talu ona momoe nei aiga i le faletaavale. Ua toe sosoo ane apa ma taumafai lava le tulimanu o le ulugalii, e faatalitali ai se taimi e toe maua ai ni o latou fale.

Na oo atu iai le fesoasoani a le Koluse Mumu i le faaiuga o le vaiaso, ma avatu iai mea o loo sili ona manaomia, e pei o lavalava ma vai mamā. O le po o le Aso Sa na oo atu iai le fesoasoani a le Toomaga mo ē Puapuagatia ma fesoasoani foi o mea mo le taimi nei, e iai taumafa, ae o loo fuafua se fesoasoani mo tamaiti i se taimi o mulimuli mai.

O le isi tulaga na maitauina o le isi lenei o aiga o loo faia le pisinisi, o le faatau o le apainu i le taulaga. Ma ua faigata foi ona faamalieina manaoga o lea pisinisi, ona ua aafia atu ai ma meafale sa faatino ai le pisinisi.

O loo masalomia o se auli na mu ai le fale mai le amataga, peitai, na ta’ua e le tasi o le aiga lava lenei, e le o le tulaga lea, ona na maitauina nisi o molimau, o le latou fale e foliga na faatama’ia e se isi ona e ese le mea na iai le auli ma le pito na sasao ane ai le afi mai tua, ma sa maua ai ni moli fagu kalasini i tua ane o le fale. Ae o loo sailiili pea le mafuaaga o le afi pei ona ta’ua e se tasi o le fanau. Ae o le faafetai sili a le tama ia Siliato, o le leai o se soifua o lana fanau na aafia ai i le malaia.